Shillong, Naiwieng 16
Ka Jylla Meghalaya kan ïoh ban pan kylliang pisa kumba T. 400 klur hadien ba ka Sorkar Pdeng ka la ailad lyngba ka jinglah ka Jylla ban wanrah katto-katne ki jingpynkylla.
Kane ka T.400 klur ka wan lyngba ka 0.5 percent ka jingpynkiew ban pan kylliang pisa bad lyngba ka jingpynkylla ïa ka Meghalaya Fiscal Responsibility and Budget Management (MFRBM) Act kaba la ai jingmynjur da ka Kynhun Myntri ka Sorkar Jylla hadien ka jingïalang kaba la long ha ka Sngi Palei.
Haba kren sha ki lad pathai khubor hadien ka jingïalang ka Kynhun Myntri, u Myntri Rangbah u Conrad K Sangma u la ïathuh ba ka jingpynkylla ïa ka MFRBM Act la leh namarba ka Sorkar India ka shah ban pan kylliang pisa katkum ka jinglah ka Jylla ban wanrah ki jingkylla ha ki tnat treikam jong ka.
Haba kylli katno ka Sorkar Jylla ka lah ban pan kylliang pisa lyngba kane ka 0.5 percent, u Myntri Rangbah u la ong ba ka jingpynkiew da 0.5 percent, kan ailad ïa ka Jylla ban pan pisa kylliang kumba T. 400 klur kaba dei katkum ka jingailad ka Sorkar India.
U la ïathuh ba ha kine ki 3 snem ne 4 snem, ka Sorkar India ka la shah ïa ki Sorkar Jylla bapher bapher ban pynkiew ïa ka jingshim pisa kylliang (increase the borrowing limit) katkum ki jingpynkylla kiba la lah ban leh.
Ha u snem ba la dep ruh, u Myntri Rangbah u la ïathuh ba ïa kane ka aiñ la pynkylla namarba ka Sorkar India ka shah ïa ki Sorkar Jylla bapher bapher ban pynkiew ïa ka jingshim pisa kylliang katkum ki jingpynkylla kiba ki Jylla lah ban leh man u snem.
