Nongpoh, Naiwieng 17
Ki nongshong dukan ha ka tamasa ‘Cherry Blossom’ ki la dap da ka jing-sngewkhia kaba jur hadien ba ki nongpynïaid ki la rai ban pynsangeh noh ïa ka sngi sdang jong ka tamasa namar ka jingther jong u slap – kaba la pynkylla ruh ïa ka Madan Kurkalang, ka jaka ba la pynlong ïa kane ka tamasa kum ka ahor.
Na ka liang ki nongshong dukan ki bym kwah ban pynpaw kyrteng haba kren sha u nongthoh khubor ki la ïathuh ba ka jingeh kaba ki kynduh ka long ba nyngkong wat ïa ki kali ban kit tiar kit tar ruh ym shym la shah ban rung satia bad nalor kata hadien ka jingpynsangeh, ki la pyrshang ban ‘phone’ ïa ki nongpynïaid, hynrei ym don satia kiba sngap bad kim banse ban shu ap sah lano kata ka prokram kan sdang ba kin ïoh noh ban die ïa la ki marbam-mardih ba ki la pynkhreh.
Kumban shu kdew hangne, na ka liang ka Indian Meteorological Department (IMD) ka la pynmih ïa ka jingpynbna ba kan don ka jinghap slap shi sngi shuwa ka jingsdang jong ka tamasa ‘Cherry Blossom’ na ka daw ka jingwan ka ‘erïong ha ki bynta jong ka West Central Bay of Bengal kaba lah ban ktah ïa ki Jylla ka Thaiñ Shatei Lam Mihngi bad ruh ki Jylla na ri thor ka ri.
Kane ka jinghap jong u slap, ym tang ba ka la pynduhnong shi kat dei ïa ki nongshong dukan hynrei, ka la pynthut ruh ïa kiba bun ki nongwan jngohkai pyrthei ha kaba la ïohi ba ki don tang khyndiat ngut eh kiba la poi ha katei ka jaka ha ka sngi sdang jong ka tamasa.
Na ka liang ki shong dukan ki la kynthoh ruh ba kum ki nongpynïaid ha ka jingshisha ki la dei ban long kiba la khreh, wat lada dei na ki bor mariang, hynrei kaba sngewsih ka long ba kim shimkhia ïa ka kam, kaba la pynbitar shi kat dei ïa ki. Ki la ong ruh ba ïa ka jingjia bor mariang ym lah satia ban leh eiei, hynrei kum ki nongpynïaid khamtam ïa kane ka tamasa kaba wan na kylleng pyrthei, ki la dei ban pynbeit bha khnang ba kan ym ktah ïa ki nongshong dukan.
Kiba bun ki nongshong dukan ki la ud ba ki marbam kiba ki la shet ki la shu sepei na ka daw jong ka jingpynsangeh ïa ka tamasa bad dawa ba ki nongpynïaid ki dei ban pyrkhat bad ai bai buria halor kane ka jingduhnong.
