Shillong, Naiwieng 17
Ka jingkyrni ha ka jingdih drok bad ka jingnang jur ka jingsaphriang jong ka jingpang AIDS ha kine ki sngi kiba mynta ka long kaba shyrkhei haduh katta katta hapoh ka jylla. Kumta ban ïalap bad pynsngewthuh paidbah halor kitei ar tylli bynta na ka liang ka Meghalaya AIDS Control Society (MACS) ha ryngkat ka jingïatreilang bad ka Inspire kan sa pynlong ïa ka rynsan ïakob tem ïa kaba la tip kum ka Multimedia Red Ribbon Superstar Meghalaya Icon ha ka 1 tarik u Nohprah 2023 ha madan Polo.
Haba kren sha ki lad pathai khubor ha ka Sngi Thohdieng, na ka liang jong ka MACS bad ka Inspire ki la ong ba ïa ka ‘Auditions’ na ka bynta katei ka rynsan kan long ha ka 30 tarik u Naiwieng 2023 ha Wahingdoh Community bad ka khusnam pisa jong katei ka rynsan ïakob tem kan long T. 2.5 lak kyllum lang baroh.
Ha katei ka ‘Audition’ ka ban sa long ha ka 30 tarik u Naiwieng 2023, yn jied 7 tylli ki kynhun tem kiban rung sha ka phainal ka ban sa long pat ha ka 1 tarik u Nohprah 2023.
Na ka liang kitei ki nongpynïaid ki la ong ba kane ka jingpynlong ïa kane ka jingïakob ka dei ha ka sien kaba 12. Kumta lyngba kane ka jingïakob kan long ruh kum ka jingpynsngewthuh paidbah halor ka jingpang AIDS ba kin lait na utei u khñiang jingpang ha ryngkat ka jingplie lad ïa ki samla ba kin dang ïai kiew shaphrang ha ki rynsan bapher bapher lyngba ka jingtbit ha ka liang ka put ka tem.
“Kane ka jingpynlong ïa kane ka jingïakob ka long ban kyntiew bad rah ïa ka tem ka put hapoh ka jylla da kaba pynsngewthuh paidbah halor ka jingpang HIV bad AIDS”, la ong kitei ki nongpynïaid.
Shuh shuh kitei ki nongpynïaid ki la ong ba katei ka jingïakob kan long kyrpang tang ïa ki kynhun tem napoh ka jylla Meghalaya bad ki nongïashimbynta ki dei ban long kiba la 18 snem ka rta shaneng. Ha katei ka sngi kin don ruh sa kiwei ki nongrwai nongtem ki ban pynbyrngia kiba kynthup ïa ka Lily Sawian, Dj Dbryn bad kiwei kiwei.
