New Delhi, Naiwieng 17
Ka jingpyrshang ban ïoh pyllait ïa ki 40 ngut ki nongbylla ha Uttarakhand kiba la sahkut hadien ba twa kawei ka Tunnel, kaba la ïaid mynta la hynriew sngi, ka la ïakynduh mawsiang ha ka Sngi Thohdieng.
Mynta ka sngi ha ka por kumba 2:45 mynsngi, la hap ban pynsangeh ïa ka jingksam thliew, la ong ki heh ka National Highways & Infrastructure Development Corporation Limited (NHIDCL), bad la hap ban khot ïa ka jingïalang jong ki ‘riew shemphang.
Kitei ki 40 ngut ki nongbylla ki la sahkut hapoh ka Silkyara Tunnel kaba don 4.5 km naduh ka step jong ka Sngi U Blei hadien ba shi bynta jong ka Tunnel hajan Uttarkashi ka la khyllem namar ka jingtwa khyndew.
Ha u kyrwoh khubor, ka NHIDCL ka la ong ba ha ka por kumba 2:45 mynsngi, ka la mih ka jingsawa orpait kaba jam bad ïa kane la ïohsngew da ki heh ka NHIDCL bad ka kynhun kaba dang ksam thliew. Ka la ong ba ka lah ban long ba kan sa don biang ka jingkhyllem bad namarkata, la pynsangeh ïa ka jingpyrshang ban phrung ïa ki ‘pipe’.
La khot ruh ïa ka jingïalang jong ki ‘riew shemphang bad ki heh ka NHIDCL ban ïakren ïa ki sienjam ba dei ban shim nangne shakhmat. Ka la don ruh ka jingsuki ha ka jingtreikam namar ka jingïai hap ka khyndew.
Katkum ki ‘riew shemphang, la hap ban ksam thliew kumba 60 metre khnang ban ïoh thep ïa ki ‘pipe’ kiba ïar 800 mm bad 900 mm, bad lyngba jong kine ki ‘pipe’, ki 40 ngut ki nongbylla ki lah ban ïoh mih na ka jaka ba ki la sahkut.
Ki kynhun ba kyrpang na Thailand bad Norway, kynthup ïa ka kynhun kaba la ïoh ban pyllait ïa ki khynnah kiba la sahkut ha kawei ka krem ha Thailand ha u snem 2018, ki la wan sha Uttarakhand ban ïarap ban ïoh pyllait ïa kitei ki 40 ngut ki nongbylla.
Haduh mynta, ki don kumba 165 ngut eiei ki briew na ki kynhun NDRF, SDRF, BRO bad ITPB nalor kiwei pat kiba don ha katei ka jaka ban ïarap pyllait ïa ki nongbylla.
Kito kiba don shabar ki lah ban ïakren bad kitei ki nongbylla da kaba pyndonkam da ki Radio. Nalorkata, la pynbiang ïa ka bam, um bad Oxygen sha kitei ki 40 ngut da kaba pynrung lngba ki ‘pipe’.
Katei ka Tunnel kaba 4.5 km ka dei kaba don hapdeng ka shnong Silkyara bad Dandalgaon ban pynïasoh ïa ka Uttarkashi bad Yamunotri.
