Khliehriat, Naiwieng 17
Ki nongïalam ka Federation of Khasi Jaiñtia & Garo People (FKJGP), Sengkmie ha ka 17 tarik Naiwieng ki la hiar sha Khliehriat ban pynskhem bad pyntian smai ïa ki nongïalam bathymmai jong ka Federation of Khasi Jaiñtia & Garo People (FKJGP) East Jaiñtia Hills District na bynta ka samoi treikam 2023-2026.
Ïa ki nongkitkam la pynskhem bad pyntian smai da u President, Bah Dundee Cliff Khongsit ha ka jingïalang kaba la pynïaid da u Bah Damian War, President FKJGP West Jaiñtia Hills District ha Community Hall Khliehriat West.
Hashuwa ka jingpynskhem ïa ki nongkitkam bathymmai, u Bah Dundee Cliff Khongsit ha ka jingkren u la ïathuh ba ïa ka FKJGP la seng ha ka 4 tarik Naiwieng 1989 bad mynta u snem ka la kynjoh ïa ka lynti ïaid kaba 34 snem.
U la ïathuh ruh ïa ka nongrim jong ka FKJGP ba ka ïeng halor ki 3 tylli ki mawbyrsiew ki ban kyrshan bad kyntiew ïa ka ri bad ka jaidbynriew; kita ki long kumno ban wanrah ïa ka jingkylla ha ka imlang sahlang, ha ka roi ka par bad kumjuh ruh ha ka synshar khadar.
“Ka FKJGP kan ym kular ïa phi ïa ka jingsuk, hynrei kynmaw ka along bad thanad ki la ap lypa ïa phi ha kano-kano ka por namar ka Sorkar ka don tang kawei ka buit – kata ban pyntieng pynsmiej ïa ki dkhot da kaba thep along hapoh ki ïing byndi ki jong ka,” la ong u Bah Khongsit.
U Vice President FKJGP, Sengkmie, u Bah Kitbok Nongphlang u la kyntu ïa ki nongïalam bathymmai ba kim dei ban long kiba kyrkieh haba shim ïa kino-kino ki mat ki jura namar ka jingkyrkieh ka lah ban wanrah ka jingktah pat ïa ka jaidbynriew hadien. U khmih lynti ba ki nongkitkam kiba thymmai kin lah ban treikam kham bha na bynta ka jingdonkam jong ka ri bad jaidbynriew.
La ïoh ruh ka jingkren kyntu kynpham na u General Secretary, KSU East Jaiñtia Hills District Unit, samla K.S. Suchiang, u President FKJGP Jaiñtia Hills Zone, u Bah Tuesday Lytep, ha ka jingdonlang da ki dkhot na ki kynhun sengbhalang bapher-bapher ryngkat ki katto-katne ngut ki Waheh Shnong. Ki nongkitkam bathymmai jong ka Federation of Khasi Jaiñtia & Garo People East Jaiñtia Hills District ki long u Deihok Sumer kum u President, Welking Swer-Vice-President, Emlang Sutnga-General Secretary, Hamkhia Siangshai-Assistant General Secretary, Andiwor Pala bad kiwei.
