Shillong, Naiwieng 17
Ka Executive Committee jong ka Khasi Hills Autonomous District Council (KHADC) ka la rai ban pynbeit biang ïa ka jingdon briew ha ki 29 tylli ki konstitwensi namar ki don ki konstitwensi kiba la bun briew palat bad don kiba khyndiat khnang ban long mar ïa ryngkat haba sam ïa ki kam pynroi.
Ha ka ilekshon MDC kaba la long ha u snem 2019 ka Mawlai konstitwensi ka la don palat 45 hajar ngut ki nongthep vote, katba ha Laban-Mawprem konstitwensi ka la duna bha ka jingdon briew namar ka la poi tang 12 hajar ngut ki nongthep vote.
Kumta ban pynïaid sted ïa kane ka jingpynbeit thymmai ïa ki konstitwensi khnang ban ïoh pyntreikam noh ha ka ilekshon MDC ka ban long ha u snem 2024, ka Executive Committee ka la thaw da ka Delimitation Committee
ka ban khlieh da u nongbishar ba la shongthait jong ka District Council Court u Dr. S. Kharsyiemlieh, u Bah M Kharkrang uba dei u Secretary barim ka KHADC kum u Secretary ka Committee bad ki dkhot ki long Dr. S.L Marbaniang kum MLA barim, Kong R Myrboh kum nonghikai skul ba la shongthait bad Dr. DRL Nonglait uba dei u Prof. Khasi ha NEHU.
Namar bym lah shuh ban phah jingtip sha man ki nongkitkam shnong, ki khlieh nongsynshar bad ki ‘riew rangbah ha baroh ki konstitwensi, ki dkhot jong kane ka committee hapoh ka jingïalam u Dr. S. Kharsyiemlieh ki la wan ïakynduh kyrpang ïa ki lad pathai khubor ha Shillong Press Club ban ai jingpynbna ïa ka tarik, ka por bad ki jaka khnang ba kin lah ban wan ai jingmut haba ki leit sha man ki distrik.
Kane ka committee kan sdang naduh ka 21 tarik mynta u bnai ban leit sha Mawkyrwat, South West Khasi Hills ban sngap na ka jingai jingmut jong ki paidbah, ha ka 24 tarik pat ha Mairang, Eastern West Khasi Hills, 28 tarik mynta u bnai kan long ha shlem treikam ka KHADC ha Shillong, East Khasi Hills na bynta ki 6 tylli ki konstitwensi, 1 tarik Nohprah ha Sohra, 6 tarik Nohprah ha Nongpoh, 12 tarik Nohprah ha Shillong na bynta 9 tylli tylli ki konstitwensi bad 15 tarik Nohprah ha Nongstoiñ ha ka por 11 baje mynstep.
U Dr. S Kharsyiemlieh u la pyntip ba ka committee kan pyndep ban pynbeit ïa ka jingphiah ryntih ïa ka jingdon briew ha ki konstitwensi hynrei ban pyntreikam kan shong ha ka rai jong ka Executive Committee.
Kumta u la kyrpad ïa ki nongkitkam shnong, nongïalam hima, ki ‘riew shemphang ba kin wan ban ai jingmut ha kitei ki tarik bad por ba la pynbeit da ka committee khnang ban shim ïa ka rai kaba khatduh ynda la pynbeit thymmai ïa ki shnong ha ki konstitwensi bapher bapher.
Nalor kane, u la ïathuh ba ka jingpynbeit thymmai ïa ki shnong ha ki konstitwensi ka dei hadien ba la pynkha distrik thymmai namar ki don ki shnong kiba hap ha kawei ka distrik katba ka konstitwensi pat ha kawei ka distrik.
Shuh shuh u la ïathuh ba ka jingbate ïa ki skhim pynroi ha ki shnong ki thaw kan long ryngkat namar ki don ki konstitwensi barit ki ïoh skhim pynroi mar kumjuh bad ki konstitwensi kiba bun nongthep vote.
