Shillong, Naiwieng 17
Ka jingpynthut ka suiñbneng ha ka Sngi Thoh-dieng ka la ïalam sha ka jingpynsangeh noh ïa ka tamasa dienglieng ne ka ‘The Shillong Cherry Blossom Festival’ ha RBDSA Sport Complex, Madan Kurkalang, Bhoirymbong, Ri-Bhoi District.
Namar ka jinghap u slap, uba lah ban buh jingma ïa baroh ki nongleit-nongwan sha katei ka tamasa bad kiba ïadon bynta kumjuh, la pynsangeh noh shuwa ïa ka sngi sdang jong ka tamasa dienglieng.
Ha kawei pat ka liang, ka long ka jingkmen ïa baroh kiba thmu ban leit sha katei ka tamasa naba ki nongpynïaid ki la pyntikna ba kin ym duh satia ïa kiei kiba ki dei ban sakhi ha kane ka sngi, namar kiba bun na ki nongïashim bynta kiba la pynbeit ha ka Sngi Thohdieng, la pynkynriah bad ïasam noh katkum ka jingbuh bynta ha ka sngi ba-ar bad sngi ba lai.
Ki paidbah kiba la thied ïa ki tiket na bynta ka sngi sdang kin ym donkam ban khuslai naba kin ïoh lad ban rung laitluid ha ka sngi ba-ar ne sngi ba lai.
Katba ïa kito kiba la thied ïa ka tiket na bynta baroh ki sngi jong ka tamasa, yn sa pynphai biang noh ïa ka pisa na bynta kaei kaba ki la siew ha ka sngi sdang.
Kumta, ban pyntikna ba ki ‘riew ieid jingrwai kin ym duh ban sakhi ïa ki nongput-nongtem bad ki nongrwai ha ka sngi sdang jong ka tamasa, ki nongpynïaid kin leh katba lah khnang ban poi sha ka thong kumjuh ban pynhun ïa ki paidbah.
Ka jinghap slap ba ñiop-ñiop ka la ïalam pynban sha ka jinghap slap ba khlem sangeh bad kaba la wanrah ïa katei ka jingpynkylla ha ka tamasa.
Shuh shuh katkum ka jingpynbna ba la pynmih, ki nongpynïaid ki la bthah ïa baroh ki nongwan sha katei ka tamasa kumjuh ki ‘riew ieid jingrwai ban ïai ap na bynta kiwei pat ki jingpyntip haba ïadei bad ka tamasa.
Na ka liang ki nongpynïaid ki la kyrpad ïa ki ‘riew ieid jingrwai ban ïa wan ha kine ki 2 sngi ba dang sah khnang ban ïadon bynta lang ha kane ka tamasa.
