Nongstoiñ, Naiwieng:
Kum shi bynta jong ka ‘Viskit Bharat Sankalp Yatra’ prokram kaba la dep ban plie bad pyntreikam ha ka 15 tarik Naiwieng 2023 da u Myntri Rangbahduh ka Ri India u Narendra Modi, ha ka Sngi Palei u Kartikeya Misra, Director DFS, Ministry of Finance ka Sorkar India, uba khmih ruh na ka bynta ka West Khasi Hills District u la wan ïuh kjat ha Nongstoiñ bad pynlong ïa ka jingïalang ha Conference Hall ka shlem treikam u Deputy Commissioner West Khasi Hills District ha ka jingdon ryngkat lang u DC Bah Garod LSN Dykes, bad kiwei ki heh sorkar ka district na ka bynta ban pynsngewthuh halor ka thong bad jingmut jong ka ‘Viskit Bharat Sankalp Yatra’ prokram.
U Kartikeya Misra haba pynshai halor katei ka prokram u la ong ba ka thong bad ka jingmut jong ka prokram ka long ban pynshai paidbah, ban pyntip sha ki paidbah shaphang ki skhim sorkar bapher bapher bad ki jingmyntoi lyngba kita ki skhim kiba la pyntreikam da ka Sorkar India na ka bynta ki nongshong shnong bad ban pyntikna ruh ba ki skhim ki dei ban poi sha kiba dei hok ban ïoh.
U la ong ruh ba ka kamram jong ki bor synshar district na ka bynta katei ka prokram ka long ba ki dei ban leit sha ki paidbah nongshong shnong bad ban pynshai halor kane ka prokram. Kane ka long khnang ban ym don iwei ruh ban duh ïa ki jingmyntoi lyngba ki skhim sorkar bapher bapher kiba ka Sorkar India ka la dep ban pyntreikam kyrpang na ka bynta ki nongshong shnong ka Ri India.
U DC bad ki ophisar kiba la ïadon ryngkat lang ha katei ka jingïalang ki la pynpaw ïa ka jingkmen halor kane ka prokram bad ki la mynjur ruh ban trei shit rhem ban pynlong ïa ka “Viskit Bharat Sankalp Yatra” prokram kaba jop bad kaba myntoi na bynta ki nongshong shnong ka thaiñ West Khasi Hills District hi baroh kawei.
