Shillong, Naiwieng 17
Kum shi bynta ban rakhe ïa ka Janjatiya Gaurav Diwas – Tribal Pride Week, ka Sankardev College, Shillong ryngkat ka jingïasnohkti lang bad ka tnat Arts and Culture ka sorkar jylla, ka la pynlong ïa ka jingïalang halor ka jingshad tynrai jong ka jylla Meghalaya ha ka 16 tarik Naiwieng ha U Soso Tham Auditorium.
Ka phang pdeng jong kane ka program ka long “Synthesis of Rhythm and Art: Revisiting and Promoting the Cultural Heritage of Meghalaya”. Ïa kane ka program la pynlong kyrpang khnang ban ïoh wanrah lut ha kawei ka rynsan ïa ki jingshad tynrai, khamtam eh ïa ka jingshad kiba kham ñiar ban ïohi ha ki por ba mynta.
Ka thong jong kane ka program ka long ban buh jingkynmaw ïa ki jingshad kiba la ieh shadien da ki longshuwa manshuwa ha ryngkat ka kup ka phong tynrai ha ka por ba ki shad kumjuh ruh ha ki sur kynud tynrai. Ïa kane ka program la pynlong khnang ruh na ka bynta ban ai jinghikai bad ïa ki longdien mandien halor ka jingriewspah ka kolshor jong ki bad kumno ba kin pynneh pynsah ïa kaei kaba ki longshuwa manshuwa ki la pynkham pynsoh.
U Bah Paul Lyngdoh, Myntri ka sorkar jylla ba dei peit ïa ka Arts and Culture, u la long kum u kongsan ha kane ka program. Ha ka jingkren ka jong u, u la ïaroh ïa ka College ba ka la shimkhia ïa kane ka phang ha ka ban kyntiew, pynkynmaw bad pyrshang kumno nan pynneh pynsah ïa ka kolshor bariewspah jong ka jylla ka jong ngi.
Ha kane ka sngi la ïadon lang u Bah Frederick Kharkongor IAS, Commissioner & Secretary sorkar Meghalaya, Bah F M Doph, IAS, Secretary ka sorkar Meghalaya, Vice Chancellor ka skulbah MLCU, ka Prof T Kharbamon, Padmashree Theilin Phanbuh, Kong Silbi Passah, Sangeet Natak Akademi Awardee, Principal jong ki College bapher bapher, nongmihkhmat jong ki sengbhalang, ki riewpawkhmat ka jylla, ki khynnah pule jong ki kolej bad skulbah.
Ka Dr Eureka F P Lyngdoh, Principal jong ka Sankardev College, ka la ai ïa kyntien pdiang sngewbha bad ka Kong Evarilang Tariang, nonghikai ka College, ka la kren halor ka jingthmu bad ka thong jong kane ka program.
Ha kane ka program la wan ïashim bynta da 22 tylli ki kynhun na ki bynta bapher jong ka jylla. Na Rilum Khasi, ki jingshad ki long Ka Shad Suk Mynsiem, Shad Mastieh (Ha Tbian Ki Sur Hara), Shad Mastieh (Hima Khyrim), Shad Thma and Ka Shad Shutwait, Ka Shad Skaiñ na Wahkhen, Shad Kiew Ïing na Nongstoiñ, Shad Rongkhli na Nongtalang, Shad Khynrum na Lynngam. Na ka Ri Bhoi, ki jingshad ki long, Ka Shad Nguh Meikha, Shad Rah Kynthei, Shad Bhoi Lasa, Shad Krud Kba bad Ka Shad Ïapngar. Nalor kita ka don ruh ka jingshad Domahi na ki Karbi. Ki jingshad na Rilum Jaiñtia ki long ka Chad Laho, Chad Sukra bad the Chad Kylla Pliang. Na Rilum Garo, ki jingshad ki dei ka Wangala, Ka Ruga, ka jingshad Hajong bad Jingshad Koch.
Kine ki jingshad kiba la kdew haneng bad ki jingshad na ka kynhun jaitbynriew Khasi-Jaiñtia bad Garo, ki dei kita ki jait jingshad kiba pynpaw shynna ïa ki dak ki shin khamtam kiba don ka khana ban ïathuh shaphang ka jingsngewnguh, ka jingshlur, ka mynsiem bashynrang, ka jingkmen bad ka jingsngewsih.
