Shillong, Naiwieng:
Ka Sankardev College Shillong ha ryngkat ka jingïatreilang bad ka tnad Arts & Culture ka sorkar jylla kum shibynta ka jingrakhe ïa ka Janajatiya Gourav Divas bad ka Tribal Pride Week ka la pynlong ïa ka jingpyni ïa ka jingshad tynrai kaba pynlong ha U Soso Tham Auditorium Shillong ha kaba la ïashimbynta da ki kynhun bapher bapher ba shong ba sah hapoh kane ka jylla.
Ka sorkar jylla lyngba ka tnad Arts & Culture kan sa pynlong ïa ka prokram Janajatiya Gourav Divas ha ki ar sngi lynter kaba la sdang naduh ka 15 tarik u bnai Naiwieng 2023 bad pynkut ha ka 16 tarik u bnai Naiwieng 2023 kum shibynta ban ïasnohkti lang bad baroh kawei ka ri ha ka ban rakhe bad kynmaw burom ïa ki jingnohsynniang bapher bapher jong ki riewïaleh laitluid kiba dei ki riewlum bad kumjuh ban batai khyndiat khynsoit shaphang ki khusnam kiba la ïoh ha ka jingïaid lynti jong ki paid riewlum.
Ka jingthmu kaba kongsan eh ba la pynlong ïa katei ka shad tynrai ka long na ka bynta ban pynneh pynsah ïa ka riti ka dustur jong ki nong Meghalaya baroh kawei.
Ki kynhun shad tynrai kiba la wan ban ïashimbynta ha katei ka lympung ki don haduh 24 tylli ki kynhun Ha katei ka sngi la sakhi lang da u Myntri ka tnad Arts & Culture, u Bah Paul Lyngdoh u ba la long kum u kongsan ha ryngkat ka jingdon lang jong ka Principal ka Sankardev College Shillong, ka Dr. Eureka F. P Lyngdoh bad kiwei kiwei.
Haba ai jingkren ha katei ka prokram, u Myntri ka tnad Arts & Culture, u Bah Paul Lyngdoh u la ong ba ka jingpynlong ïa katei ka prokram ka long ruh ka jingpynim bad pynneh pynsah ïa ki jingshad bapher bapher bad ban pyntikna ba ki paid riewlum kin dang ïai kiew katba dang mih ki por.
U la ai khublei ïa ka Sankardev College kaba la shim ïa katei ka bynta ban pynlong ïa katei ka prokram jingshad kaba la wanrah ïa ki jingshad bad ki nongshad bapher bapher wat naduh ki thaiñ nongkyndong ruh kumjuh.
