Imphal, Naiwieng 17 (UNI)
Shiphew tylli ki seng saiñpyrthei kiba don sha ka liang pyrshah ki la kyntu ïa ka Lat ka jylla Manipur, ka Anusuiya Uikey, ba kan pynbeit ïa ka jingïalang bad u Myntri Rangbahduh, u Narendra Modi, ban ïakren halor kumno ban wad ïa ki lad ki lynti ban wanrah biang ïa ka jingsuk bad ka jingbeit ha Manipur.
U Myntri Rangbah barim ka Manipur, u O Ibobi Singh, u la ong ba ki nongmihkhmat na ki 10 tylli ki seng saiñpyrthei ki la dep ban leit sha New Delhi ban pan por ban ïakynduh ïa u Modi, hynrei ym shym la aipor satia.
Na ka daw ba ka jingïakynad ha Manipur ka dang ïaineh wat hadien hynriew bnai, ki 10 tylli ki seng saiñpyrthei ki la phah da ka jingthoh sha ka Lat ban kyntu ïa u Myntri Rangbahduh ban wan sha Manipur bad ban ïakren bad kine ki seng bad kiwei pat ki mamla.
Lada u Modi um kwah ban wan sha Manipur, ki nongmihkhmat na ki 10 tylli ki seng ki la long ba la khreh ban leit sha New Delhi, la ong u Ibobi haba kren sha ki lad pathai khubor ha ka shlem treikam ka Congress.
Ki 10 tylli ki seng ki kynthup ïa ka AAP, AIFB, AITC, CPI, CPI(M), INC, JD(U), NCP, RSP, SS(UBT) ki la thoh sha ka Lat ban pynpaw ba ka jingïakynad ha Manipur ka la neh mynta la palat hynriew bnai. Nalor ba ki la don bun bah kiba la duh noh ïa ka jingim, ki don ruh palat 60,000 ngut ki briew kiba la kylla phetwir. Ka rukom im ha ki jaka sah shipor ka long ruh ka bym biang bad bym ïahap bad ka rukom im ki briew, la ong kine ki seng.
Nalorkata, ki don ruh ki jingjia jong ka jingshah pynïap, jingsiat kuli bad jingrahbor ba kynthup ïa ki khynnah pule bad namarkata, ki nongshong shnong ki don hapdeng ka jingsyier bad ki mad ïa shibun ki jingeh ki bym lah ban batai.
Kane ka jingïakynad ka la ktah ruh ïa ka kamai ka kajih jong kiba bun bah ki nongshong shnong, bad ka dang don ruh ka jingbym ïa shaniah hapdeng ki para nongshong shnong.
Shuh shuh ki la ong ba kata ka Peace Committee ba la thaw da ka Sorkar Pdeng ka khlem pat leh ïa kano-kano ka kam ban wanrah biang ïa ka jingsuk ha Manipur. Haba peit nadong shadong, kitei ki seng ki sngew ba dei tang ka Sorkar Pdeng kaba lah ban leh eiei bad ban shim ïa ki sienjam bakongsan.
Ki la kdew ba don jingkyrmen sa tang ha u Myntri Rangbahduh ka Ri ban wanrah biang ïa ka suk ka saiñ ha jylla bad ki 10 tylli ki seng ki la rai ban kyntu ïa ka Lat ba kan pynbeit ïa ka jingïalang bad u Modi ha kaba kan don ka jingïatai sani ban wanrah biang ïa ka jingsuk ha Manipur.
