Shillong, Naiwieng 17
Ka jingban ka jingduk ka pynlong ïa ki briew ban tare ruma ïa ka kam kat kaba lap kaba shem. Ha kane ka pyrthei kyrduh kam wat la bun ki samla kiba la pyndep ïa ki jingpule ba kham shajrong pynban ka long kaba jwat ban ïoh kam ïoh jam.
Kane ka khubor ka dei ïa ka samla Dalina Dkhar ba shong ba sah ha Mootyrshiah B hajan Mowkaïaw, West Jaiñtia Hills District hadien ka jingkhlad noh u kpa ka ïing bad pyndep ïa ka klas-12 na Mookyndeng ka la jied noh ïa ka lynti ban long kum ka nongap pahara ne security katba ka ïoh bylla.
Kane ka samla kynthei ka la ïoh ban pyndep ïa ka jingshah hikai na ka bynta ka 45 sngi ha Sub Centre Training Tornado Security Agency kaba don ha Iooksi, Umdeinlin, West Jaiñtia Hills District kaba hap ha Mowkaïaw konstitwensi hynrei mynta kan hap ban wad ïa ka kam katba ka ïoh ban leit ap pahara na ka bynta ban pyndap ïa ka ïing ka sem.
Ka samla Dalina ka la leit ban bylla ha ïing briew hadien ba la pyndep ïa ka klas-12 hynrei hadien ba ka la ïoh jingtip ba ka don ka jaka ai jinghikai security ka la pan jingbit na ka kmie khnang ba kan lah ban pyndap ïa ka ïing ka sem.
Haba ïakren bad ka samla Dalina ka la ïathuh ba hadien ba u kpa uba ban ka jingshitom bad khlad noh na kane ka sla pyrthei, ka kmie kam lah shuh ban kyrshan skul bad kumta ka la leit ban bylla ïing briew noh.
Ka la ïathuh ba kan pdiang beit lada ka ïoh kano-kano ka kam ban ap pahara na ka bynta ban pyndap ïa ka ïing ka sem.
Ha kajuh ka por ka pynpaw ka jingsngewbynnud haba ka la dep shah hikai namar ka sngewtynnad palat haba ka sah ha Iooksi.
Katba u samla Richard Marsharing uba na Klew, Ri Bhoi District u la ïathuh ba hadien ba u la shah bat ha ka klas-12 ha King of King Higher Secondary School, u la sdang ban ñiah kali noh ban kyrshan ïa ka ïing ka sem.
U la ïathuh ba hadien u la ïohi ïa ki jingpynbna u la jied ïa kane ka jaka hikai sha Iooksi namar u kwah ban long kum u nongap pahara.
Namar kata, u don jingkyrmen ba un sa ïoh ïa ka kam bylla namar mynta u la ïoh ïa ka syrnod na kane ka jaka hikai namar kumba la batai ba shisien ba la ïoh ïa ka wait ha kti dei ban pyndonkam.
