Shillong, Naiwieng 17
Ki nongtrei ASHA na kylleng ki distrik kiba don hapoh ka shatri jong ka Meghalaya ASHA Worker’s Union (MAWU) ha ka 17 tarik mynta u bnai ki la pynlong da ka jingïaid paidbah kaba jai-jai ba la sdang najan ka ïing u Lat ka jylla bad pynkut pat hapoh ka Madan Malki.
Katei ka jingmih jong ki nongtrei ASHA ban pynlong da ka jingïaid paidbah kaba jai-jai ka dei hadien ba ka jingkren ka Myntri ka sorkar jylla kaba dei khmih ïa ka tnad ka koit ka khiah, ka Dr. Mazel Ampareen Lyngdoh kaba la ong ba ki nongtrei ASHA ki dei tang ki nongtrei mon sngewbha. Kane ka jingkren jong ka Myntri ka la pynbitar ïa ki nongtrei ASHA bad ha kajuh ka por katei ka Myntri ka la kyntait ïa ka jingkam ba ki ASHA ki ïoh tang T.66 ha ka shisngi bad ban dawa ba dei ban pynkiew noh ïa ka tulop jong ki na ka T. 2000 sha ka T. 5000.
Ha katei ka jingïalum jong ki nongtrei ASHA ha madan Malki ki la ai ka jingkren ban pynsngew sha ki bor sorkar khamtam ïa ka Myntri da kiba la ther ïa katei ka Myntri da kaba ong ba la ïohi kumba katei ka Myntri ka koit ka khiah kam don shkor bad ka la kren ïa kaei kaba ki ASHA kim lah ban pdiang.
Shuh shuh ki la ong haba katei ka Myntri ka kren kum ka briew kaba sngewdon phang kaba bat ïa ka kyrdan Myntri, ka dei ban kren da ka jingtip, ka jingsngewthuh ban pynsngewtynnad ïa ki nongtrei Asha.
Na ka liang ka Kong Soni Kharjana kaba dei ka nongaiktien jong ka MAWU, haba ai jingkren ha katei ka jingïalang, ka la ong ba kumba katei ka Myntri ka la kren sha ki lad pathai khubor ba ki nongtrei ASHA ki ïoh ïa ki jingsiew kaba T.5000, kumta kum ki nongtrei Asha kin dawa beit noh ïa ka T.5000.
“Kum ka Myntri ka koit ka khiah kaba sngewthuh ïa kane ka bynta kum ka longkmie hi, ngi da kyrpad rit hakhmat jong phi ba phin sngewthuh lem ïa ka jingeh jong ki ASHA namar ba ngim kwah shuh ban bun nia”, la ong ka Kong Kharjana.
Shuh shuh kitei ki nongtrei ASHA ki la kyrpad ïa ka Myntri ba kam dei ban kren laplah hynrei ba kan da pyrkhat lem ïa ki kum ki longkmie kiba bsa ïa ka ïing baroh kawei.
