Shillong, Naiwieng 17
Ki khmat nongïalam ka Hynñiewtrep National Liberation Council (HN LC) ki la pynpaw ba u Chairman ne General Secretary kin nym lah ban wan sha ka miej jingïakren lada ka Sorkar kam pat weng ïa ki kyndon kiba pynngat ïa ki ha ki jingkynnoh (case), bad ka la bynshet ha u Vice Chairman, u Teimiki Laloo ban peit ïa ki kam bad kumno ki kam ki ïaid shakhmat.
Ha u kyrwoh ba la pyllait da u Bobby Marwein, ‘Chairman cum C-in-C’ ka HNLC, bad Saiñ-kupar Nongtraw ‘General Secretary cum Publicity Secretary’ ka HNLC, la ong ba ka Sorkar ka ong ba dei ban wan ïashimbynta hi ki khmat nongïalam da u Chairman bad General Secretary, hynrei “ngi kren shai ba lada ym pat weng ïa ki kyndon ba shah pynngat pyrshah ïa ngi, lane lada ym pat soi ïa ka soskular (framework agreement for a ceasefire is signed), u chairman lane general secretary kim pat lah ban wan ïashimbynta sha ka jingïakren. Kumta ngi la bynshet ha u Vice Chairman bathymmai, u Teimiki Laloo, ban peit ïa ki kam bad kumno ki kam ki ïaid shakhmat.”
“Ki jingïakren ïasuk ki dei ban plie lad ban lap ïa ka lynti ban pynbeit lyngba ki jingïatai bad ki sienjam kiba don ka jingsngew jan. Hynrei ka Sorkar India ka paw ba ka pyrkhat ba ki jingïakren ki dei ha ka dur jong ka jingpyndem lane buh sharud ïa ki tiar,” la ong u kyrwoh ka HNLC.
“Ngi kwah ïa ka jingsuk kaba neh kaba ïaid lyngba ka jinglaitluid bad ka hok, da kaba pdiang bad burom ïa ki jingsngew bad jingangnud jong ki briew ka Hynñiewtrep kum kawei ka kynhun kaba ïatylli. Kumta ngi pyrshah ïa kano-kano ka rukom pyrkhat shaphang ka jingsuk kaba tang shipor kaba lah ban pynduh noh ïa ka jingdon jong ngi bad ka hok ban kut jingmut nalade,” la bynrap u kyrwoh ka seng.
Kumta ka HNLC ka ong ba ka long kaba kongsan ban shim ba bun tylli ki seng kieng suloi ha ka Thaiñ Shatei Lam Mihngi (North East) ki la wan pyndem bad pynwai noh ïa ki seng jong ki, hynrei ki khlem pat ïoh kano-kano ka jinglah ban pynbeit shisyndon lyngba ka saiñ hima sima.
“Kane ka jingduna ka rai kaba dei ban shim ka la pynlong pynban ban mih ki kynhun thymmai kaba nang pynkynrum pynkynram shuh shuh ïa ka jinglong jingman. Ha India, ka NSCN la seng hadien ba la soi ïa ka Shillong Accord 1975, bad ka ULFA ka mih ha ka por jong ka jingïakhih ha Assam (Assam Agitation -1979-85) kum ka jingpynphai ïa ki jingeh kiba mad da ki trai muluk ka Assam (Assamese people). Haba ka Assam Accord jong u snem 1985 kam shym la urlong ban pynhun ïa ki jingangnud, ka ULFA ka la nang ïoh bor bad long kawei ka bor kaba khlaiñ ha ka jingïaleh pyrshah ïa ka Sorkar India. Lada ka Sorkar ka kwah shisha ban ïoh ka jingsuk kaba neh, ka dei ban ïaid da kajuh ka sur jong ka jingsngewkhia shisha kumba leh ha ka por jong ka Mizo Accord 1986. Lada ngi peit kham palat ïa ka India ngi lah ban peit thuh ruh ïa ka Palestine Liberation Organisation (PLO), kaba soi ïa ka Oslo-I Accords ha u snem 1993, bad ka Oslo-II Accords ha u snem 1995. Wat hapdeng ki jingshimkhia ba khlem thait, ka jingïoh ïa ka rai kaba long shipor haba ïadei bad ka jingïakynad ka dang rieh, kumba long ka Hamas kaba mih bad pynphai kylla kum ka jingai ïa ka jubab,” la pynpaw ki nongïalam ka HNLC.
