Shillong, Naiwieng 17
Ka Ïingbishar Meghalaya High Court ka la thung ïa uwei na ki nongsaid aiñ, u Dr N. Mozika kum u (amicus curiae) lane nongïarap haba shim ban bishar ïa ka mukotduma (PIL) kaba ïadei bad ki jingpynbiang ïa ki jaka thang briew.
Ka Ïingbishar ka dang shim bishar ïa ka PIL kaba la mudui da u President ka Seng Khasi Hima Mawsynram.
Ha ka Sngi Thohdieng, ka Ïingbishar lyngba u Acting Justice H.S. Thangkhiew bad Justice B. Bhattacharjee ka la shim ban bishar biang bad ka la pynmih ruh katto katne ki rai.
La ong ba na ka liang u nongsaid aiñ, uba dei u Additional Advocate General, u K. Khan u la pynsngew ba ki jingbthah kiba ong ba dei ban phah ïa ka kaiphod ba-ar, ka dei kaba dang shu ïohpdiang shen, bad u kyrpad ban shah ban kham ïoh ka por haba ïadei bad kane.
La ong ba kane ka mukotduma (PIL) ka dei kaba kham ïar haba ïadei bad ki jingpynbit jingpynbiang ïa ki jaka thang briew.
Kumta la ong ba ka long kaba donkam ban don u nongsaid aiñ ban ïarap ïa ka Ïingbishar haba ïadei bad kane ka bynta, ha kaba la mynjur ban thung ïa u Dr. N. Mozika kum u Amicus Curiae, bad u la mynjur.
Hadien kane, la pynbeit biang ïa ka sngi ban shim bishar ïa kane ka kam ha ka 8 tarik Nohprah, 2023.
Kumta na ka liang ka Registry ka hap pynbiang noh ïa ki kot ki sla kiba donkam baroh bad phah sha u Amicus Curiae.
Kum ban pynkynmaw, u President ka Seng Khasi Hima Mawsynram, u la thoh shithi sha u Chief Justice ha ka 8 tarik Nailur ban kyrpad ban shim hi da ka Ïingbishar ban bishar namar ka jingpynjah ïa ki kot ki sla kiba la don bad ka Sorkar Jylla, kata, bad ka tnat Planning, Investment Promotion & Sustainable Development haba ïadei bad ka jingmang pisa ban tei ïa ka jaka thang briew jong ka Seng Khasi Hima Mawsynram, Mawsynram Syiemship ha Kenmynsaw, ha shnong Synteiñ, East Khasi Hills District.
Ka Ïingbishar ka la pynwan ïa kane kum ka Public Litigation Interest (PIL) hadien ba la don ka shithi ujor kaba la phah da ka Seng Khasi Hima Mawsynram sha u Chief Justice ha ka 8 tarik Nailur, 2023.
“Ka long kaba donkam ban pyntikna ba kin biang ki jingdonkam (adequate facilities) ym tang ha Shillong hynrei ha kiwei ki bynta ka Jylla ban don ka jaka thang briew kaba paka na ka bynta ban pyndep ïa kaba sah,” la ong ka Ïingbishar lyngba ka jingbthah kaba la pynmih ha ka 22 tarik, Nailur.
