Nongstoiñ, Naiwieng 17
Ka jingshimkhia bad ka jingpynurlong ïa kaei kaba ki paidbah ki angnud la kham slem ban ïoh noh ïa ka surok kaba bha, watla u la shah rem noh ha ka ilekshon kaba la dep, hynrei ka la pynlong ïa ka Synjuk ki Nongsynshar Shnong Maweit Area ba kin ym lah ban shu klet hynrei ki la mih shakhmat ban pynpaw ïa ka jingsngewnguh ïa u MLA barim ka Mawshynrut, Bah Gigur Myrthong.
Kane ka la paw ha ka Sngi Thohdieng ha kaba ka Synjuk ki nongsynshar shnong Maweit Area ka la ïoh ban pynkup burom ïa u Bah Myrthong, MLA ha kajuh ka por kum u MDC ka Mawshynrut uba la long uwei na ki nongmihkhmat uba la don bynta ban shimkhia ban leh eiei ha kaba ïadei bad ka jingïoh ban pyntrei ïa ka surok Nongstoiñ-Maweit.
Katei ka jingpynkup burom ka la long ruh ha ka jingïalang jong ka Synjuk kaba la wan ban ïashim bynta da ki nongïalam shnong ka thaiñ Maweit ïa kaba la pynlong ha ka Hall jong ka St. Mary’s School. Nalor ki nongïalam shnong katei ka thaiñ, la don lang ruh u President ka Synjuk, u Bah T. Umïong, u Bah Toning Tyrsa, Adviser ka Synjuk, u Bah Orius Thongni, Secretary ka Synjuk bad kiwei-kiwei.
U Bah Gigur Myrthong haba kren ha katei ka jingïalang u la ai khublei kyrpang ïa ka Synjuk kaba la pynkup burom ïa u na ka bynta ki kam kiba u la leh ha ki 5 snem kiba la dep.
“Hooid ka long kaba eh ban ïoh lut ha kajuh ka por hynrei nga shu ïathuh ba ha u 2018, ka jingthmu kaba kongsan bad ha ka jingmut jingpyrkhat jong nga naduh ka mynsiem, ka dei tang ki ar tylli ki projek, katta na bynta ka surok Riangdo – Athiabari bad ka Nongstoiñ sha Maweit bad ka long kaba sngewkmen ïa nga ba watla ngam shym la poi sha ka thong ruh hynrei nga sngew heh mynsiem haba nga leit sha ka thaiñ Maweit bad ka thaiñ Nongtrai namar ïa kaei kaba nga angnud la ïoh ban pynurlong namar ban kren ka long kaba suk hynrei haba ngi la shim ïa ka kam ban kit ban bah ïa ka dong ka thaiñ, ka long kaba eh. Kumta nga la pyrshang ha ki san snem,” ong u Bah Gigur.
U Bah Gigur u la pynpaw ruh ba kine kiei-kiei kiba urlong ki dei ka jingïatreilang jong ki paidbah bad lehse lada um jop ha u 2018 kiei kiba u thmu kim urlong hynrei donbok ba ki paidbah ki ai lad ïa u ha u 2018.
U la ong ruh ba watla u la shym la jop ha ka ilekshon kaba dang shu dep hynrei na ka liang jong u ym dei ba un ym ïatreilang shuh bad ki paidbah, bad katta ka dei kaba bakla, hynrei kumba u la ïai trei un don lang bad ki paidbah.
“Ka jingjop ka jingrem ka ju don beit, ngim dei ba ngin sngewrem hynrei ka jingkwah ka jong nga ka long ba ngin rat dyngkhong ïa ka jingeh ha ka konstitwensi. Kumta nga ai ka jingkhublei ba ngan ïai ïatreilang na ka bynta ka bha ka miat jong ka dong bad ka thaiñ,” ong u Bah Gigur.
U la ïathuh ruh ba balei ba ka 12 km kaba dang sah jong ka surok Nongstoiñ – Maweit ka urlong biang, kane baroh ka dei ka jingïatreilang.
U Bah Gigur u la kyntu ruh ïa ki paidbah ba kin ïai ïatreilang namar ki dang bun ki jingsahdien kiba la dong bad ka thaiñ ki dang donkam.
“Ngin ïatreilang ruh bad u MLA uba mynta. Ngim dei ban kiar bad ngim dei ban sngew seng hynrei ngi dei ban pyrkhat na ka bynta ka eh ka shon jong ka dong ka thaiñ,” ong u Bah Gigur.
