Shillong, Naiwieng 17
Ka Hynñiewtrep Achik National Movement (HA NM) kan sa leit ïakynduh ïa u Myntri Rangbah ka Assam, u Himanta Biswa Sarma (HBS) halor ki 3 tylli ki mat jingdawa jong ka Jylla.
Haba kren sha ki lad pathai khubor ha ka Sngi Thohdieng, u President ka HANM, Bah Lamphrang Kharbani u la ong ba ka seng ka don ka jingpyrkhat ban ïakynduh ïa bun ngut ki MP ka Thaiñ Shatei Lam Mihngi khamtam ïa u Myntri Rangbah ka Assam, u Himanta Biswa Sarma (HBS).
Haba kdew ba ka seng ka dang wad lad ban ïakynduh ïa u Sarma, u la ong, “Ngi kwah ba ma u (Sarma) kum u Myntri Rangbah ka Assam – ka Jylla kaba long shipara bad ka Jylla jong ngi, ngin ban jur ha u, ngin kyrpad ïa u ba un ïakren lem ïa ki MP ka Assam ba kin kyrshan bad kren ïa kine ki 3 tylli ki mat jingdawa kiba ka Jylla ka donkam kyrkieh.”
U la ong ba ka jingbuddien jong ka seng nangne shakhmat ka long ban ïakynduh shuwa ïa u Sarma, u ‘Hero’ jong ka Thaiñ Shatei Lam Mihngi bad pynsngew ruh ba ka seng ka lah ban leit biang sha Delhi ban ïakynduh ïa u Kiren Rijiju, MP ka Arunachal Pradesh lem bad kiwei-kiwei ki MP ka Thaiñ Shatei Lam Mihngi.
“Ngi dang wad ki lad ki lynti la ngin ïakynduh lut ïa baroh ki MP jong ka thaiñ khnang ba ngin kyrshan markylliang na bynta ka jingbit-jingbiang jong ngi, ki paid ‘riewlum,” u la ong.
Ka HANM, dang shen ka la leit ban ïakhih sha Delhi ban dawa pyntreikam ïa ka ILP, ka jingpynrung ïa ki ktien Khasi & Garo ha ka Khyrnit ba 8 kumjuh ban pynbeit ïa u pud u sam hapdeng ka Meghalaya bad Assam.
Haba ban jur ïa ki 3 ngut ki MP ka Jylla ban shimkhia lem halor kitei ki mat jingdawa, u la ong, “Mynta ka shong sa ha ki 3 ngut ki nongmihkhmat ka ïingdorbar Parliament…Bah Vincent H. Pala, Agatha Sangma bad Dr. W.R. Kharlukhi. Ngi kwah ba kine ki 3 ngut ki nongthaw aiñ ka Parliament kin kren bad pynkhlaiñ da kaba ban jur sha ka Sorkar Kmie halor kine ki mat.”
Ha kajuh ka por, u la ong ba ki dei ban kren hapoh Parliament halor kitei ki dawbah jong ka ri bad ka jaidbynriew.
“Katkum ka jingsngewthuh jong ngi, lada ka tnad kam pohïing ka Sorkar Pdeng ka shimkhia katba ki jong ngi kim shimkhia, ka mut kumno ka Parliament kan mynjur ïa kine ki mat jingdawa jong ka jaidbynriew,” u la ong.
Shuh shuh haba pynkynmaw ba ha ka 3 tarik mynta u bnai ka HANM ka la pynlong ka jingïakhih ha Jantar Mantar, New Delhi, utei u nongïalam u la bynrap, “Ngi la kren da kaba shai ba haba ïadei bad ka ILP, ngi la ong ym dei tang na bynta ka Meghalaya hynrei na bynta ka Thaiñ Shatei Lam Mihngi baroh kawei.”
