New Delhi/Dehradun, Naiwieng 19
Ki kynhun ïarap ha Uttarakhand ki dang ïakhun bad ka por ban ïoh pyllait im ïa 41 ngut ki nongtrei kiba la sahkut hapoh jong kawei ka ‘tunnel’ (kaba la twa) mynta la 170 kynta eiei.
Ka jingsahkut hajuh jong ki nongtrei la bun kynta hapoh katei ka ‘tunnel’ ka la pynkhuslai jingmut ïa kiba bun halor ka koit ka khiah bad ka bha ka miat jong ki.
Ki ophisar hynne ka sngi ki dang pyrshang ban sam thliew nalor ka jaka lum ha kaba kitei ki nongtrei ki la sahkut ha katei ka ‘tunnel’ kaba la twa ha ryngkat ka jingduna ka bam ka dih bad ki lad pynïasoh.
Ka kam shna rynsan ban sdang ïa ka jingsam thliew na shajrong ka la sdang myn hynnin janmiet hadien ba ka kor tih kaba khlaiñ bor ka la wan poi ha katei ka jaka na Indore, Madhya Pradesh.
Ka kynhun ophisar na Prime Minister’s Office (PMO) bad ki ‘riewshemphang ha katei ka jaka ruh ki ïatreilang ryngkat-ryngkat ha ki 5 tylli ki buit treikam ban ïoh pyllait im ïa kitei ki 41 ngut ki shynrang.
“Ki ‘riewshemphang ki la pynpaw ka jingsngew ba ha ka jaka ban trei tang ha kawei ka buit treikam, dei ban trei ha kajuh ka por ha 5 tylli ki buit treikam ban poi kloi sha ki nongtrei kiba sahkut,” ong u nongaibuit barim sha u Myntri Rangbahduh ka ri, u Bhaskar Khulbe.
U Khulbe u la ong ba la khmih lynti ba yn sa lah ban pyllait im ïa ki nongtrei ha ki 4-5 sngi ha ryngkat ka jingïatreilang jong ki kynhun bapher-bapher.
“Hynrei lada ki Blei ki long kiba sbun, ka lah ban kloi ïa kane ruh,” u la ong.
U Myntri Sorkar Pdeng, u Nitin Gadkari bad Myntri Rangbah, u Pushkar Singh Dhami hynne ka sngi ki la poi ha katei ka jaka ban khmih bniah ïa ka jinglong-jingman.
“Ngi ïaleh katba lah ban pyndonkam ïa baroh ki lad ki lynti kiba don. Ki jait kynhun bapher-bapher ki treilang hangne,” ong u Dhami.
Ïa ka kam tih la pynsangeh noh ha ka Sngi Thohdieng janmiet hadien ba ki ophisar ki la ïohsngew ïa kawei ka jingsawa or-pait na ka kor treikam.
Ka Sorkar Pdeng ka la lum ruh ïa ka jingïalang ‘High-level’ ha kaba la ïakren bad ki kynhun bapher-bapher kiba la shah bynshet kam halor ki 5 tylli ki lad ban pyllait im ïa ki nongtrei, ong ki tyllong khubor.
Ka long ka jingkhuslai ka bym don jaka shuh na bynta ki bahaïing hasem kiba ap habar ka ‘tunnel’. Ki sur ki la nang tlot, ki la sdang ban duh bor, ong ki bahaïing hadien ba ïakren bad katto-katne ki nongtrei.
Na ka liang ki doktor ki la ban jur halor ka jingdonkam jong ki lad jingïarap na bynta ki nongtrei kiba la sahkut, namar ka jingtieng ïoh ba ka jingsahkut slem jong ki ka lah ban donkam ïa ka jingsumar ha ka liang ka jingmut jingpyrkhat bad ka met ka phad kumjuh.
Kitei ki 41 ngut ki nongtrei ki la sahkut naduh ka step Sngi U Blei hadien ba kawei ka bynta jong ka ‘tunnel’ ka la twa. Ki ophisar ki la ong ba baroh ki nongtrei ki don hapdeng ka jingshngaiñ bad la pynbiang sha ki ïa ka bam bad ka um ban dih lyngba ki ‘pipe’ kiba la dep sam.
Na ka liang u Secretary ka tnad Road Transport & Highways, u Anurag Jain ha ka Sngi U Blei u la ong ba ka Sorkar ka la phah ïa ki dawai ‘vitamin’, kumjuh ki dawai ki ban pynduna ïa ka jinglynga-pisa bad ki soh (dry fruits) sha ki 41 ngut ki nongtrei kiba la sahkut mynta la 7 sngi ha ka ‘tunnel’ kaba la twa ha Uttarkashi District jong ka Uttarakhand.
“Donbok ba ka don ka jingshai hapoh namar ka bording ka meh. U don u ‘pipe’ bad kumta ka um ruh ka don. U don u ‘pipe’ uba 4 inshi, bad lyngba une, ngi phah jingbam naduh ka sngi nyngkong,” u la ong.
Ka Silkyara ‘tunnel’, kaba jngai kumba 30 km na ka distrik headquarter ka Uttarkashi bad kaba shim por 7 kynta da ka kali na ka nongbah ka Uttarakhand, Dehradun, ka long shi bynta jong ka Char Dham projek jong ka Sorkar Pdeng.
Ïa katei ka ‘tunnel’ la shna hapoh ka National Highways and Infrastructure Development Corporation Limited (NHIDCL).
Katei ka ‘tunnel’ ka la twa ha ka por kumba 5.30 baje mynstep ha ka Sngi U Blei jong ka taïew ba la lah.
