Shillong, Naiwieng 19
Ka Voice of the People Party (VPP) ha ka taïew ba la dep ka la ïakynduh ïa ki bor pynïaid ka English and Foreign Languages University (EFLU), Hyderabad, bad aiti ïa ka jingthoh na bynta ka bhah ki samla pule ‘riewlum ka Jylla haba ïadei bad ki jingpule bapher-bapher kiba la tyrwa da katei ka skulbah kaba don ha Shillong.
Ha katei ka jingthoh ba la aiti sha ka EFLU, Hyderabad, lyngba u Registrar, Prof. Narasimha Rao Kedari, ka VPP ka la ong ba ka Shillong, kaba long kawei na ki jaka pdeng ka pule-puthi jong ka thaiñ ka don bun tylli ki shlem ai jinghikai ha kaba ka jingpynleit jingmut bad ka jingthmu ka long ban kyntiew ïa ka jinglong-jingman ka pule-puthi, ha kawei ka liang da kaba plie bun tylli ki lad ki lynti ïa ki samla pule khnang ban pyurlong ïa ki jingangnud jong ki. “Nga sngewthuh ba dei ha kane ka liang ba ïa ka Shillong Campus (jong ka EFLU) la pynïeng ban pynbiang ïa ka pule-puthi kaba paka ha ka ‘English’ bad kiwei-kiwei ki tnad pule sha ka thaiñ baroh kawei bad khamtam ïa ka Jylla. Hynrei, naduh ba la seng ïa ka, ka jingdon ki samla pule na Meghalaya ka duna bha ha ka skulbah,” ong u MLA ka VPP na Mawlai, Bah Brightstarwell Marbaniang ha ka jingthoh sha ka EFLU, Hyderabad.
Ha katei ka jingthoh, u Bah Marbaniang u la ong kam don kano-kano ka bhah kaba la ai sha ka Jylla ym kumba long kiwei pat ki skulbah kum ka North Eastern Hill University kaba pynbiang ïa ka bhah pule na bynta ki samla pule ka Jylla. Utei u nongmihkhmat ka VPP u la kyntu ruh ïa ka EFLU ban shimkhia ïa katei ka kam bad ban pyrkhat lem haba ïadei bad ka bhah ïa ki samla pule ka Jylla na bynta ki jingpule kiba la tyrwa ha EFLU, Shillong naduh ka samoi pule ka ban wan. Katkum ka jingïathuh u Bah Marbaniang, u Kedari u la kular sha ka seng ba un sa pynsngew sha ki bor ba halor kum ka Sorkar Pdeng halor katei ka mat.
U Registrar ka EFLU u la ong ruh ha u MLA ba ka long kaba donkam ban wanrah ïa ka ‘Ordinance’ hapoh Parliament naba ka dei ka skulbah jong ka Sorkar Pdeng.
Haba kren sha ki lad pathai khubor na Hyderabad, u Bah Marbaniang u la ong ba ka National Law University ha Shillong kaba la sdang ïa ka jingtreikam jong ka hapoh ka Jylla mynta u snem, ka don ka bhah pule kaba 50% na bynta ki samla pule ka Jylla. “Ngi sngew ba ka EFLU kaba don ïa ka shnat treikam ha Shillong ka la dei ban don katto-katne ki jaka kiba la bhah na bynta ki samla pule ka Jylla lym kumta, ka jingdon jong ka hangne, kan ym long ka jingmyntoi ïa ngi,” ong u MLA.
