Shillong, Naiwieng 19
U MLA ka NPP uba la jop arsien na Sohra, Bah Gavin Mylliem u la ïathuh ba ki don kumba 2 ngut ki nongkitkam kiba pynpaw ba ki kwah pan tiket na ka seng (NPP) ban ïakhun ïa ka ilekshon MDC ha u snem 2024 na Sohra.
Haba ïakren bad u Bah Gavin ha kine ki sngi, u la pyntip ba ka NPP kan sa lum jingïalang ban wad kyrtong bad ha kata ka por kin sa pynpaw ki kyrteng jong ki nongkitkam kiba kwah ban ïakhun ïa ka ilekshon MDC.
U la pynpaw ba haduh mynta ki dang don tang 2 ngut hynrei ym pat tip la kin dang don biang haduh ban da dei ka sngi ban wad ïa u kyrtong.
U Bah Gavin u don jingkyrmen ba u kyrtong ba ka NPP kan pynïeng na Sohra un ïoh ka jingkhlaiñ namar ki nongkyrshan haduh mynta ki long ki trei shitom.
U la pyntip ruh ba ha kine ki bnai ban sa wan un sa lum noh ïa ka jingïalang na ka bynta ban ïoh noh ïa u kyrtong khnang ban suk haba pynithuh sha ki paidbah.
Kumban shu pynkynmaw, u Bah Gavin u la jop ïa ka ilekshon MLA na ka PDF hynrei hadien katto-katne bnai hadien ba la jop, u la rung noh sha ka NPP ryngkat u MLA ka PDF, Bah Banteidor Lyngdoh.
