Shillong, Naiwieng 19
Ka National People’s Party (NPP) ka lah ban jied da ka MLA ka East Shillong konstitwensi, ka Kong M Ampareen Lyngdoh, kaba long ruh ka Myntri ha ka sorkar MDA 2.0, ba kan long kum ka kyrtong jong ka seng na ka bynta ka ilekshon MP Lok Sabha na 1-Shillong Parliamentary Constituency.
Katkum ki tyllong khubor ba la ïoh lum, la ïathuh ba ha kine ki sngi ka la don ka jingïalang hapdeng ka Kong Ampareen bad ki katto katne ngut ba kynthup ïa u National President ka NPP, u Conrad K Sangma, uba long ruh u Myntri Rangbah, bad u President ka NPP Me-ghalaya, u Bah Prestone Tynsong, uba dei ruh ha kajuh ka por u Symbud Myntri Rangbah.
Ha kane ka jingïalang la don lang ruh ki bahaïing hasem bad ki paralok kiba ïajan bad ka Kong Ampareen, la ïathuh ki tyllong khubor.
Ki tyllong khubor ki ïathuh ba ka Kong Ampareen ka la buh ïa ka jingtyrwa hakhmat ki nongïalam jong ka seng ba kan long kum ka kyrtong na ka bynta ka ilekshon MP Lok Sabha ka ban long ha u snem ban wan. Hadien ba la ïoh pdiang ïa ka jingtyrwa, ki nongïalam ki la pynpaw ba ki kyrshan ïa ka jingthmu jong kane ka Myntri ban ïakhun ïa ka ilekshon na ka seng.
Kaba sah mynta ka long sa tang ban pynbna ïar ïa ka kyrteng jong ka Kong Ampareen kum ka kyrtong ka NPP ha ka ilekshon MP, la ong ki tyllong khubor.
Lah ban kdew ba u Bah Prestone ha ki khyndiat sngi ba la lah u la pyntip ba ka NPP ka lah ban pynbna ïa ki kyrtong MP na Shillong bad Tura hashwa ban kut u bnai Naiwieng.
Kham hashwa ki la mih ki khubor ba ka NPP ka la thmu ban pynïakhun da u MLA barim ka Umroi, u Bah George B Lyngdoh, uba long ruh u Vice-President ka TMC ha Meghalaya. Ha ka banyngkong, ka la don ka jingïabeit ban pynïakhun da u Bah George, hynrei kham hadien, ka la mih ka jingpyrshah na ka longïing longsem jong ki ‘Dhar’.
Ka longïing longsem jong ki ‘Dhar’ ki la ai jingmut sha ki nongïalam ka NPP ban pynïakhun da u MLA barim ka Mawhati, u Bah Dasakhiatbha Lamare, uba long ruh u khun jong u MLA barim, u Bah Ngaitlang Dhar.
Na ki tyllong khubor kiba ïajan bad ka NPP, la ïathuh ba ïa mynta, ka longïing longsem jong ki ‘Dhar’ ki la ai ïa ka jingkyrshan ïa ka Kong Ampareen ba kan long kum ka kyrtong ka seng ha ka ilekshon MP Lok Sabha.
