Shillong, Naiwieng 19
Ka Meghalaya Accredited Social Health Activists Workers’ Union (MAWU) ka la rai ban nang pynjur shuh-shuh ïa ka jingïakhih jong ka naduh ka 27 tarik Naiwieng ban pynbor ïa ka Sorkar Jylla ban pynurlong noh ïa ki jingdawa ka seng.
“Ngi la pynkut ïa ka kylla nyngkong, kata ka jingpynlong ïa ki jingïaid paidbah ba jai-jai ha baroh ki distrik bad ha ka kylla ba-ar, ngi ki nongtrei ASHA, ngin shong kyllaiñ mungor khlem buh por mar pyrshah ka Secretariat tad haduh ba ka Sorkar kan shah skhor ïa ki jingdawa jong ngi,” ong ka President ka MAWU, Kong M.J. Myrsing hadien ka jingïalang ka Executive Committee kaba la long ha Mawlai Motsyiar ha ka Sngi Saitjaiñ.
Ki nongtrei ASHA ki la ong ba ka Sorkar ka la leh kyllut halor ki jingdawa jong ki bad Executive Committee jong ka seng ka lap ba wat ka Myntri ka tnad ka koit ka khiah, Dr. M. Ampareen Lyngdoh kam don jingsngew eiei halor ka jingeh jong ki.
Halor ka jingong ka Myntri ba ki jingkhang Sorkar ki plie beit na bynta ka jingïakren bad ki, ka Kong Myrsing ka la ong ba ka jingkhot jong ka (Myntri) kam long ha ka rukom kaba dei.
“Kane ka pyni ba ka long kaba kloi ban ïakren tang lada ki nongtrei ASHA ki kwah ban ïakren bad ka Sorkar hynrei na ka liang jong ka, ngi sngew ba kam don jingkwah ban ïakren bad ki ASHA,” ong ka Kong Myrsing.
Katkum ka jingsngew jong ka, lada ka Dr. Lyngdoh ka kwah shisha ban pynbeit ïa katei ka jingeh, ka la dei ban ai da ka shithi ka ban khot ïa ki ASHA sha ka jingïakren.
“Hynrei ka jingkhot jong ka, ka long tang lyngba ki lad pathai khubor,” ka la bynrap.
Na ka liang ka President, ka la ong ba ha ka 27 tarik Naiwieng, tang ki dkhot jong ka Executive Committee kin ïashim bynta ha katei ka jingïakhih ba khlem buh por hynrei lada ka Sorkar ka ïai kuman, kata naduh ka 28 tarik, baroh ki nongtrei ASHA jong ka Jylla kin sa wan sa katei ka jaka.
Ki ASHA hapoh ka Jylla ki la dawa na ka Sorkar ban kyntiew ïa ka jingïoh (fixed honorarium) na ka T.2,000 sha ka T.5,000.
