Shillong, Naiwieng 19
Ka jingsdang ki shi kurim ban shna kum ka jaka jngohkai pyrthei ha dewlynnong Nongmahir kaba hap ha Umsning, Ri-Bhoi distrik ka la wanrah pynban ïa ka lad kamai jakpoh ïa ki samla ka shnong Nongdiengngan kaba don sha shilliang ka dewlynnong Nongmahir.
Ka jingsdang paw ka jaka jngohkai pyrthei ha dewlynnong Nongmahir ka dei ka jingsdang nyngkong jong ki shi kurim, kata u Bah Shestar Thangkhiew bad ka Kong Esbina Kharbuki kiba la sdang naduh u snem 2019 shuwa ban wan ka jingkhangdam ïa ka pyrthei baroh kawei namar ka khlam COVID-19.
Haba ïakren bad uwei na ki nongkinglieng u bym kwah ban pynpaw kyrteng u la ïathuh ba ki don kumba 20 ngut kiba kinglieng bad kiba ap ïa ki nongjngohkai na Nongdiengngan kaba dei na surok.
U la ïathuh ba lada wan bun ngut ki ju shim 100 tyngka marwei hynrei lada ki wan tang 2 ngut, ki shim 300 tyngka haduh 400 tyngka shisien leit buh.
“Lada ngi leit buh ngi hap ap lang ïa ki haduh ba kin da wanphai hynrei don ka por ba lada ki slem ngi dang wanphai shuwa sha surok bad ngin sa leit shaw pat ynda ki la dep shongkai,” u la ong.
U la ïathuh ba mynshwa ha ka por bym pat paw ka Nongmahir, ki nongkinglieng ki shu leit buh tang ïa ki nongkhwai dohkha hynrei naduh ba la sdang ki 2 ngut ki shi kurim, ki nongkinglieng ki la sdang ban kamai jakpoh haba la bun kiba wankai.
U la ïathuh ba ki nongjngohkai pyrthei kiba kham bun ha ka por lyïur ki dei na kiwei ki Jylla bad ha ka por tlang ki bun beit napoh ka Jylla. “Ngim sngewthait shuh ban kinglieng namar ngi la mlien man ka sngi wat lada jngai kumba shi kilomitar,” u la ong.
U la batai ba ban leit sha Nongmahir dewlynnong ki lieng ki hap ïaid napdeng ka wah kaba la ker tawiar da ki san tylli ki dewlynnong. Nangta u la ïathuh ba kane ka wah ka dei kaba la pynlang shi jaka ba la pyntuid na Damsait, ka jaka saiñ bording. Shuh shuh u la bynrap ba hadien ba la sdang ki 2 ngut shi kurim, mynta ki la mih sa 2 tylli kiba thymmai kum ka Amazing Resort bad Lake Paradise bad sa 2 tylli pat kiba dang shna.
Ha kajuh ka por, u la pyntip ba lada kito ki briew kiba kwah sah ha Lake Paradise ki la pynïeng ia ka jaka kali kaba la buh kyrpang ha shiliang surok khnang ban shngaiñ haba ki sah ha kine ki dewlynnong.
