Shillong, Naiwieng 19
Watla kiba bun kim pat pdiang ban ai jait sha u kpa, hynrei kiba la ai jait kpa tang ha ka jaidbynriew Khasi bad Jaiñtia ki la poi palat 50 hajar ngut hynrei kiba la pynrung dkhot pura ha ka Syngkong Rympei Thymmai (SRT) ki la don palat san hajar ngut.
Ka jaidbynriew hyn-ñiewtrep ka dei ka jaidbynriew kaba ai jait sha ka kmie hynrei ki rangbah Khasi pat ha u snem 1965 ki la sdang ban wanrah noh ïa ka rukom pyrkhat thymmai da kaba sdang ban ai jait noh sha u kpa khnang ba ka ïing ka sem kan skhem kumba long lem kiwei ki jaidbynriew kiba la dep ai jait sha u shynrang.
Ïa kane ka Syngkong Rympei Thymmai la sdang ban seng ha u snem 1990 kaba la ïaid mynta palat 33 snem haduh mynta u snem 2023 hapoh ka jingïalam u Bah Teibor Khongjee kum uPresident bathymmai uba la shimti naduh u snem 2021 ha jaka u Bah Ribartis Parïong.
Ban buddien ïa kane ka seng, u Nongsaiñ Hima u la ïoh ban ïakren kyrpang bad u Bah Teibor Khongjee uba la ïathuh ba haduh mynta ki dkhot kynthei bad shynrang ki la poi palat 5 hajar ngut.
U la ïathuh ba ki rangbah Khasi ha ka por ba ki leit ban pynsngewthuh sha ki thaiñ Sohra ha u snem 1970, ki longkmie ki la mih da ka jingbitar kiba la bat la ki tari ki la beh ban dung ïa ki rangbah namar ki sngewphylla haba kim pat ju bna ban ai jait sha u kpa namar barabor ki ai jait sha ka kynthei.
Naduh kata ka por ki rangbah ki la sdang ban kynran dien shipor namar ka jingshah byrngem hynrei ha u snem 1980, ki la sang ban pynlong jingïalang biang bad ha u snem 1990 ki la ïoh ban thaw syndon ïa ka Syngkong Rympei Thymmai.
U la ïathuh ba haduh mynta ym don shuh kiba byrngem ïa ki shynrang kiba ai jait kpa hynrei ki don tang kiba kynthoh tang ha ki kot khubor bad ha ki rynsan lad pathai.
Haba kylli balei ki rangbah ki pynkylla ban ai jait sha u kpa, u Bah Teibor u la ïathuh ba ki ‘riew rangbah ki la ïohi ba ka jinglong-jingman ha ka jaidbynriew namar u shynrang um don bor ha ïing lok ne ha ïingkur namar u shynrang haba u don sha ïingkur u dang kitkhia hynrei ynda u la leit lok um don jingkitkhlieh shuh hynrei u shu wan peit teng-teng.
U la ong ba ka jingai jait sha ka kmie ka la pynhiar kyrdan ïa u shynrang bad kumta ki kwah ban wanrah da ka jingai jait sha u kpa kumba long lem kiwei ki jaidbynriew.
U la batai ba mynshwa u Khasi u ai jait sha u shynrang hynrei don kiba ïathuhkhana pateng ba namar u Khasi u phet jaka na kawei pat namar ka bun palat ka jingïakhun thma kumta ki shynrang bun ki shah pynïap, ki jah lynti kumta ki pyrkhat ban pynneh pynsah ïa ka jait ki sngewdei ban ai jait shipor sha ka kynthei namar ka shong ha ïing.
U la pynpaw ka jingsngewkmen ba haduh mynta kiba la ai jait sha u kpa ki la don palat sanphew hajar tangba ki khlem rung dkhot ka SRT hynrei ki kyrshan bad ai mynsiem pat.
Shuh shuh u Bah Teibor u la bynrap ba wat ki shynrang kiba dang ai jait sha ka kmie ki ai mynsiem tangba kim nud ban rung dkhot.
U la pyntip ba kine kiba ai jait kpa ki dei ki Khasi kiba la sah sha kiwei ki Jylla bad sha kiwei ki ri ka pyrthei.
