Shillong Naiwieng 19
Hadien ka jingjia shah tynrah ka longkmie ha Mawlai Mawdatbaki ha uwei u nongñiah ar shaka uba pynher sted ïa ka ar shaka jong u, bad hadien ka jingleit pynsngew da ka Dorbar Shnong Mawlai Mawdatbaki, na ka liang ka PWD ka la sdang ban buh ‘speed breaker’ kum ka jingtehlakam ïa ki nongñiah kali kiba ñiah khlemakor bad kiba 22buh jingma ïa ka jingim briew.
Kum ban pynkynmaw, uwei u khynnah uba la jan dap 18 snem u la ñiah sted ïa ka ar shaka bad tynrah ïa kawei ka longkmie ha ka janmiet jong ka 13 tarik mynta u bnai ha kaba ka la duhei ïa la ka jingim.
Kane ka longkmie ka dang wanphai na jaka trei bad dang shu hiar na ka kali kamai ha Mawdatbaki ban leit sha la ïing ha Mawlai Kyntonmassar.
Haba ïakren bad ki nongkitkam shnong ka Mawlai Mawdatbaki, ki la ïathuh ba na ka liang ka PWD ka la sdang ban pyntreikam ïa ki katto katne ki jingai jingmut jong ka shnong bad la sdang ban buh ïa ki ‘speed breaker’ ha Mali-I.
La ong ba na ka liang ka shnong ka la ju ai jingmut ha ki por ba la leit sha ka tnat ba dei khmih, bad ha jingïakynduh dang shen bad u Symbud Myntri Rangbah u Bah Prestone Tynsong, la ai jingmut ban shim ki lad kiba pyrkhing bad tehlakam ïa ka rukom ñiah khlemakor ki ar shaka bad ki kali khamtam eh kito kiba dang rit rta.
La ai jingmut ruh ban buh pulit pynïaid kali ha Lad Mali-I ha ka jaka ba ju ïeng ki taksi IGP bad ki Autorickshaw kiba kamai sha Polo, nalor ki dak (signage) kiba shai kiba kdew ïa ki lad bad surok bad ‘zebra crossing’ ban pynsuk ïa ki paidbah ban jam na shiliang sha shiliang ka surok.
