Ahmedabad, Naiwieng 19 (UNI)
Uwei u samla na Australia u la leit ban mareh shapoh ka madan ïalehkai kriket ha Narendra Modi Stadium kaba la long ha ka Sngi U Blei ha kaba u la kdup ïa u nongïalehkai kriket ka India, u Virat Kohli, bad ha ka sopti jong une u samla la ïohi ka jingthoh kaba kyrshan ïa ka Palestine.
Kane ka jingjia ka la jia hakhmat u Myntri Korbar Ri, u Amit Shah, bad hashwa ba u Myntri Rangbahduh, u Narendra Modi, un wan sha madan ban peitkai ïa ka jingïa-khun phainal jong ka ICC World Cup 2023 hapdeng ka India bad Australia ha kaba ka Australia ka la rah da kaba suk ïa ka nam lahduh.
“Sangeh noh ka jingpynbthei bom ha Palestine” lane “Stop Bombing Palestine” – ki dei ki kyntien ba la thoh hakhmat ka sopti jong utei u samla uba la pynithuh ïalade ba u dei u John na Australia. Ha ka bynta ba shadien jong ka sopti, u la thoh “Pynlaitluid ïa ka Palestine” lane “Free Palestine”. Nalorkata, u la kah ruh ïa ka durkhmat lajong da ka jaiñ kaba lang bad ka lama jong ka Palestine.
Katei ka jingjia ka la jia ha ka por ba dang ïaid ka ‘over’ kaba 14 ha ka ‘inning’ banyngkong katba u Kohli bad u KL Rahul ki dang tied na ka bynta ka kynhun India.
Mar ïa ïohi ïa kane ka jingjia, ki pulit ki la leit mareh bran-bran bad ki la tan noh ïa u John na madan, bad hadien kata, ka jingïalehkai ka la lah ban sdang biang.
Kham hadien, haba jubab ïa ki jingkylli jong ki nongthoh khubor, utei u samla u la ong, “Nga dei u John…na Australia. Nga la rung sha madan ban ïakynduh ïa u Virat Kohli… Nga kyrshan ïa ka Palestine.”
Na ka liang ki pulit ki la rah noh ïa u John sha thanat ban pynlong ïa ka jingtohkit.
Lah ban kdew ba kane ka la jia katba ka thma hapdeng ka Israel pyrshah ïa ka Hamas ka dang ïaid. Kane ka thma ka la sdang naduh ka 7 tarik Risaw hadien ba ka kynhun pyntriem Hamas ka la thombor ïa ka Israel bad na ka liang ka Israel ka la jubab kylla da kaba ther ïa ka Gaza Strip.
Da ki hajar ngut ki briew na Gaza Strip bad Israel ki la shah pynïap ha kane ka thma kaba la ïaid mynta la palat shi bnai.
