Shillong Naiwieng 19
Ka jingbun ki kali ha nongbah Shillong ka la nang buh jingeh ïa ki pulit pynïaid kali ha kane ka nongbah bad tang ki ar shaka ki la don haduh 90,809 tylli haduh mynta.
Ka jingbun ki ar shaka ka la nang pynkhapngiah ïa ki surok bad katkum ka jinglum jingtip U Nongsaiñ Hima, la ïathuh ba hapoh u snem 2023, sa tang katto katne ki ar shaka kin palat ïa ka 1 lak tylli kiba dei ki ML05.
“Haduh mynta, ki la don 90,809 tylli ki ar shaka kiba dei ki ML05 kaba mut ha East Khasi Hills district bad kiba kham bun ki ar shaka ki dei ha Shillong,” la ïathuh ka tyllong khubor.
La ïathuh ba ki ar shaka ki la kiew sted bha tang hapdeng kine ki khyndiat bnai.
Tang haduh ka 21 tarik Naitung, 2023, ka jingdon ki ar shaka ka long 72,309 tylli, hynrei mynta ki la don 90,809 tylli. La ïoh jingkheiñ ba ki ar shaka kiba dei ki ML05, kiba kynthup ïa ki Bike, Scooter bad Scooty.
Haba phai sha ki saw shaka kiba dei ki ML05, ki don haduh 87,718 tylli tang haduh ka 21 tarik Naitung 2023. Hynrei haduh mynta, la ïathuh ba ki saw shaka ki la jan don 90 hajar tylli.
Ka jingdon ki kali ha Shillong bad ha East Khasi Hills district baroh kawei kiba dei ki ML05, ka pyni shai ba ka Shillong ka la khapngiah shaba palat namar ka dei ka nongbah kaba ki kali na kylleng ki district ka jylla kynthup na Assam bad kiwei ki Jylla ki wan ïaid lyngba.
Lada kheiñ sa ki trok bad kiwei kiwei ki kali heh kiba ïaid lyngba ki surok ka nongbah Shillong, ka jingdon ki kali ka la bun shaba palat, bad nang pynjur ïa ka dheng kali.
Ka jingeh ka long ïa ki pulit pynïaid kali ban tehlakam bad pyrkhing ïa ka rukom pynïaid kali khamtam eh ha Shillong kaba dei ka nongbah jong ka Jylla.
