Shillong, Naiwieng 19
Namar ka jingkyrduh kam ha kine ki sngi ba mynta, hynrei ki samla kiba la pyndep ïa ka ‘Master Degree’ ha ki skulbah bapher-bapher ki la hap ban leit shah hikai ban long nongap pahara ne ‘Security’ ha Sub-Centre Training Tornado Security Agency kaba don ha Ïooksi, Umdeiñlin, West Jaiñtia Hills District. Haba ïakren bad ka nonghikai jong kane ka jaka hikai, ka Kong Ferdina Muksor kaba dei na ka shnong Umdeiñlin, Ïooksi, ka la ïathuh ba kine ki sngi, ki samla kiba la pyndep ïa ka Bachelor of Art bad Master Degree haba ki shu shong ha ïing ki la wan ban shah hikai ha kane ka jaka ban pynkhreh lypa lada kim ïoh kam hadien ba ki la pyndep ïa ka jingpule.
Ka la ïathuh ba kum ka samla ka la sdang ban shim kum ka nonghikai ha u snem 2021 ha kawei ka kompeni bad ha kane ka ‘Tornada Security’ ka la ïoh ban hikai ha u snem 2023. Ka la ïathuh ba ka la ïoh ban shah hikai ïalade ha kiwei ki nonghikai kiba hashuwa bad na ka jingïoh jinghikai na kiwei pat ka la nang ban hikai sa ïa ki khynnah kiba dang wan shah hikai thymmai.
“Haduh mynta u bnai ki la don palat hajar ngut ba nga la ïoh ban hikai ïa ki samla kynthei bad shynrang namar ha kawei ka kynhun ngi ju hikai tang 45 snem kiba la wan na kylleng ka Bri u Hynniewtrep,” ka la ong.
Ka la ïathuh ba ki don shibun ki samla kiba la dep ïa ka jingshah hikai ki bynnud ban leit phai ïing namar ki sngewtynnad palat haba ki sah ha kane ka shnong tang 45 sngi bad don ruh kiba ïam namar ki sngewtynnad palat.
Kumta ka la kyntu ïa ki samla kiba khlem kam khlem jam ki lah ban wan shah hikai kum ki ‘Security’ ba kin suk haba ki leit wad kam namar ki la ïoh jinghikai. Ha ka juh ka por, ka la kyntu ïa ki samla ba kim dei ban lehraiñ ban wan shah hikai namar wat kiba la pyndep ïa ki kyrdan kiba heh ki wan shah hikai namar kim kwah ban shu shong ha ïing.
