Shillong, Naiwieng 20
Ka Myntri ka tnat ka koit ka khiah ka Kong Ampareen Lyngdoh ka la khot ïa ki nongïalam ka Meghalaya ASHA Workers Union (MAWU) ban wan sha ka miej ïakren ha ka 22 tarik mynta u bnai na ka bynta ban ïakren ïa ki mat jingdawa jong ki nongtrei ASHA.
Ha ka shithi ba la phah sha ka President ka MAWU, ka tnat ka koit ka khiah ka la pyntip ba “Ka Myntri ka tnat ka koit ka khiah ka la khot da ka jingïalang bad ki nongkitkam bad nongïalam ka MAWU ha ka 22 tarik mynta u bnai hapoh ka shlem treikam ka Myntri ban ïakren bad ka jingsangeh treikam ki ASHA”.
Kane ka wan hadien ba ki ASHA ki la rai ban pynlong da ka jingïakhih shong kyllaiñ myngngor kaba khlem pud sngi naduh ka 27 tarik mynta u bnai hakhmat ka khyrdop Secretariat ban pyrshah ïa ka jingleh mynthi ka Sorkar jylla ban kyntiew ïa ka bai nong ki ASHA sha ka T.5000.
Lah ban kdew ba ha ka 17 tarik mynta u bnai ki ASHA ki la pynkut ïa ka jingïakhih da kaba ïaid paidbah.
“Ngi la rai ban pynjur ïa ka jingïakhih bad ha kajuh ka por ban pynlong da kaba shong kyllaiñ myngngor kaba khlem pud sngi naduh ka 27 tarik mynta u bnai hakhmat ka khyrdop Secretariat,” la ong ka President jong ka MAWU ka Kong Marajune Myrsing.
Ka Kong Mira ka la pyntip ba ki ASHA kin nym pyndem ha ka Sorkar lada ka Sorkar kam kular ban pynurlong ïa ki jingdawa ki nongtrei ASHA.
