Shillong, Naiwieng 20
U nongmudui haba ïadei bad ka jingkhapngiah bad ka dheng kali ha Sor Shillong u la ai ïa ki katto-katne tylli ki kyrteng sha ka Meghalaya High Court ha ka Lah Sngi U Blei ba kin long kum ki dkhot ba laitluid jong kata ka ‘Decongestion Committee’ lane ka kynhun ka ban peit ïa ki lad ki lynti ban pynkylluid ïa ka sor.
Ka High Court kan sa shong pyrkhat ha ka 1 tarik Nohprah, 2023 kaba long ka sngi ba kan bishar biang ïa ka jingmudui.
Ka High Court ka la pynpaw ba ki la don bun tylli ki kaiphod kiba la ai ha kaba ïadei bad ka jinglong-jingman jong ka dheng kali bad ïa ki lad ki lynti ba la shim ban pynduna ïa ka dheng kali da kaba ïamir jingmut bad ki kynhun bapher-bapher.
Hynrei, ka jinglong-jingman haba ïadei bad ka dheng kali ka dang neh kumjuh lane kam pat kylla.
