Shillong, Naiwieng 20
Ka Sorkar Jylla ka dang ap sah ban pyllait noh ka Sorkar Pdeng ïa ka baibam (scholarship) ki samla pule kaba ki khlem pat ïoh jong u snem 2022-2023.
Haduh mynta ka Sorkar Pdeng lyngba ka tnat Tribal Affairs kam pat phah pisa ban siew baibam ïa ki samla pule kaba tip kum ka post-matric scholarship ha kaba ka Sorkar Jylla ka bei 90 na ka 100, katba ka Sorkar Jylla ka bei 10 na ka 100.
Haba kylli balei ka baibam ki samla pule kam pat lait haduh mynta, u Myntri ka tnat pule puthi, u Rakkam A Sangma u la ong ba ka Sorkar Jylla ka ïai buddien ïa kane bad na ka liang ka Sorkar Pdeng ka lah ban pyllait teng ïa ka pisa ha kine ki khyndiat taïew.
U Rakkam u la ong ba ha ka taïew ba la dep, ki ophisar ka tnat pule puthi ruh ki la don ka jingïakynduh bad ki bank khnang ban tip ïa ki jingeh kiba khlem lah ban phah ïa ka pisa sha ki jaka kynshew pisa (bank account) ki samla pule ha ki snem ba la leit.
U la ong ba ki don ki samla kiba khlem ïoh ïa ka baibam namar ki don ki jingbymbiang haba ïadei bad ki IFSC Code, ki account number bad kiwei kiwei.
