Nongstoiñ, Naiwieng 20
Ka Hynñiewtrep Youths’ Council (HYC) Mawshynrut Circle ha ka Lah Sngi U Blei ka la ïoh ban ïakynduh ïa u Myntri ka tnat bording bad C&RD Block ka Sorkar Jylla ban ïakren halor kiba bun ki jingeh kaba ïadei bad ka dong ka thaiñ Mawshynrut, kumjuh ruh kumno ban wanrah ïa ki jingmyntoi ha ka thaiñ.
Ki nongïalam ka HYC Mawshynrut ki la ong ba ki katto-katne ki mat ba ka HYC ka la ïoh ban rah bad ïakren bad u Myntri ki long ban thung noh da u SDO ba pura jong ka MePDCL Mawshynrut Division.
Shuh shuh la dawa ruh ban plie noh ïa ki Sub-Station Umsohpieng bad ha Shahlang namar ïa kine ki sub-station na ka liang ki paidbah jong ka thaiñ ki la thrang ban plie khnang ba ka rukom ai jingshakri kan long kaba janai bad kham suk ïa ki paidbah nongshong shnong. Ha kane ka jingïakren na ka liang u Myntri ha ryngkat u Director ka MePDL u la kular ban shim khia.
Ki la ong ruh ba ka HYC ka la dawa ban buh noh kham bun ki linemen bad muster roll ban trei ha laiñ bapher bapher kiba don hapoh Mawshynrut namar ki thaiñ kiba don ha Mawshynrut ki long kiba ïar bha bad ka la eh ïa ki nongtrei kiba don tang khyndiat ngut khamtam ha ki por lyiur ha ka jingkyllon ki dieng ki siej hapoh ka thaiñ.
Nalor kata, ki la ïathuh ruh ba ki saw shnong kita ka Nongmisei, Nongkabur, Nongumkap bad Porthnang ki kwah ban tan ïa ka bording ilektrik jong ki na ka laiñ Nongjri Mapaier Nongmisei haduh Nongumkhap kiba hap ha ka Mawshynrut MePDCL Division. Kat ïa mynta kine ki saw shnong ki tan ïa ka bording ilektrik na ka laiñ Mawdiang kaba jngai bad ki hap ïaid shaduh Noval Dibra kaba hap ha South Garo Hills district ba ki hap ban leit siew ka bai bording ilektrik ne leit donkam ba ïadei bad ka bording ilektrik.
La ong ruh ba ka jingbym don pura u Assisstant Executive Engineer hapoh MePDCL hapoh Mawshynrut Division, kane ruh kan ktah bha rukom ban pyntyllun ïa ki kam jong ka light hapoh ka thaiñ, bad ka HYC ka la ïoh ruh ïa ka jingtip ba ki don haduh 11 tylli ki transformer ha ki shnong kiba la duh bad ban shu kynmaw na jinglap jong ka HYC ynda la duh ki transformer ka shim por ïa ka tnat ban kan shna ne ban buh thymmai biang.
Ki nongïalam ka HYC ki la ïathuh ruh ba halor kine ki bynta, na ka liang u Myntri u la ong ba un sa shimkhia ïa ka bynta bad u kyntu ruh ïa ki paidbah nongshong shnong ba ki dei ban siew thikna ïa ka bai bording khnang ba lada duh ki transformer ka kham suk ïa ka tnat ban bujli thymmai ïa u transformer. Na ka liang ka HYC ka la dawa ban shna noh ka Building ba thymmai na ka bynta ban shong u SDO jong ka MePDCL Mawshynrut division.
Nangta, shuh shuh ka HYC ka la ong ruh ba ka jingud ki paidbah halor ka jingduh khah khah ka bording ilektrik ha kine ki bnai ba la dep ka la ktah shi katdei ïa ki paidbah haba ki wan donkam hapoh ophis C&RD Block Mawshynrut. Kumta la dawa ban buh noh da ka Generator kaba thymmai khnang ba ka rukom ai jingshakri kan long kaba janai bad halor kitei ki jingdawa ki nongïalam ka HYC ki la ïathuh ba u Myntri u la kular ba un sa shim khia.
