Shillong, Naiwieng 20
Ka Meghalaya High Court ha ka Lah Sngi U Blei ka la maham ïa u Rangbah Shnong ka Tyrsad, Umkseh kaba hap ha East Khasi Hills ba un hap shim ïa ka jingkitkhlieh lada jia eiei kaba sniew lane lada don ka jingpyndik ïa ka nongmudui ïa kawei ka mukotduma.
Kane ka nongmudui ka dei kaba la tip kyrteng kum ka Kong Dista Hynñiewta bad ka la leit sha High Court ban ujor halor ka jingkynnoh ba ma ka lem bad ki bahaïing hasem ki la shah pyndik bad shah tait shnong ha u Rangbah Shnong ka Tyrsad, Umkseh.
Nalor kata, ka don ruh kawei ka mukotduma kaba dang sah hapdeng katei nongmudui bad u Rangbah Shnong. Kane ka mukotduma ka dei kaba dang sah ha kawei ka ïingbishar (Trial Court) bad ka dei halor ka jingïakajia halor ka jaka.
Hynrei, ka jingmudui ha High Court ka long beit halor ka jingshah pyndik bad tait shnong.
Na ka liang u Rangbah Shnong ha ka jingthoh ba u la ai, u la kyntait ba kam shym la don ka jingtait shnong, jingpyndik lane jingbyrngem ban pynpra ïa ka ïing ka sem jong katei ka longkmie bad ba katei ka longkmie ryngkat bad ki bahaïing hasem jong ka ki lah ban ïashim bynta ha kino-kino ki kam jong ka shnong.
Hadien ba ka High Court ka la sngap ïa ki muktiar jong kitei ki arliang mamla bad haba pynwai noh ïa kane ka mukotduma, ka la ong ba ka pdiang ïa ka jingthoh ba katei ka longkmie bad ka ïing ka sem kim shym la shah pyndik eiei, hynrei ha kajuh ka por ka High Court ka la ong ba u Rangbah Shnong un hap shim jingkitkhlieh lada jia eiei ïa katei ka longkmie lane lada ka shah pyndik ha ka shnong.
Haba ïadei bad katei ka mukotduma kaba dang sahteng, ka High Court ka la ai jingmut ïa ka ïingbishar (Trial Court) ba kan ai ïa ka rai kham kloi katba lah.
