Shillong, Naiwieng 20
U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ha ka Lah Sngi U Blei u la hiar jurip ïa ka Khasi Heritage Village kaba don ha Mawphlang kum shi bynta ban peit ïa ki jingpynkhreh jingpynkhrum na ka bynta ban pynlong biang ïa ka Monolith Festival mynta u snem.
Ha kane ka sngi, ïa u CEM la synran lang da u Chairman ka KHADC u Bah Lamphrang Blah, uba dei ruh u MDC ka Mawphlang ryngkat u Executive Member ka tnat Arts & Culture Bah Victor Rani nalor ki karikor bad ki nongïalam ka Hima Mawphlang.
“Ka jingwan jurip mynta ka long eh ha kaban khmih ba haduh katno ki jingpynkhreh ki la ïaid khnang ba ngin lah ban ai ïa ka kaiphod sha ka Monolith Committee,” la ong u Bah Pynïaid haba kren sha ki lad pathai khubor.
Katkum ka jingong jong u, ka Monolith Festival ka dei kaba tamasa kaba donkam bha namar kane ka tamasa ka dei kaba pyni sha ka pyrthei ïa ka jingriewspah ka jaidbynriew ha ka riti ka dustur, ka synshar ka khadar, ka ktien ka thylliej, ka jinglong trai halor ka khyndew ka shyiap bad kiwei kiwei.
“Ka tamasa kan pyni ïa ka spah tynrai ba ngi don, ka ktien ka thylliej jong ki 54 tylli ki Hima kiba ïapher, ka riam tynrai, ka kup ka sem, ka bam tynrai na ki Hima bapher bapher,” u la ong.
U CEM u la pyntip ruh ba ka KHADC ha ka jingshisha ka la buh ban pynlong ïa ka tamasa haduh lai sngi kata naduh ka 14 tarik Nohprah haduh 16 tarik Nohprah mynta u snem.
“Hynrei na kaei kaba ngi shem mynta, ngin sa rah ïakren hapoh ka Monolith Committee ban pynbeit ïa ki tarik ba thikna bad ban bishar ruh la ngi dang lah ne em ban pynlong mynta u snem,” u la ong.
Shuh shuh u Bah Pynïaid u la pyntip ba da ka jingïatreilang bad ka Sorkar Jylla, ka tnat jngohkai ka la ïarap ban maramot ïa bun ki jingdonkam ha kane ka Khasi Heritage Village, kynthup ruh ïa ka ka Khasi Heritage Museum ban buh ïa ki tiar na la tynrai ka jaidbynriew, ki kot kiba batai ïa ka riti dustur bad kiwei kiwei.
U la pyntip ruh ba u Myntri ka tnat PWD (Roads) u la pynmang haduh T.4 klur ban maramot ïa ki surok naduh na Mawngap ter ter sha Mawphlang na ka bynta ka tamasa.
Ha kajuh ka por u la pyntip ruh ba ka KHADC ka don jingthmu ban pynlong noh ïa ki prokram na la tynrai manla ka taïew hapoh ka Khasi Heritage Village khnang ba ki nongshang sawari kin myllen bad kane ka jaka kaba don ha syndah ka khlaw Lawkyntang jong ka Hima.
