Shillong, Naiwieng 20
U Myntri ka tnad jngoh kai pyrthei ka jylla, u Bah Paul Lyngdoh u la ong ba ka tamasa ‘Cherry Blossom’ ka la long kawei na ki tamasa kaba jop bad kaba ishongkun na ka jingwan jong ki paidbah nongpeitkai bad kumjuh ha ka jingdon jong ki jingtem jingrwai bapher-bapher.
Ïa ka tamasa ‘Cherry Blossom’ la thmu ban pynlong ha ki lai sngi lynter kata naduh ka 17 tarik bad pynkut ha ka 19 tarik u Naiwieng 2023 ha madan Kurkalang, Bhoirymbong. Ha ka 17 tarik kaba dei ka sngi sdang jong katei ka tamasa na ka liang ki nongpynïaid katei ka tamasa ki la hap pynsangeh noh ban sdang ha katei ka sngi na ka daw ka jingshah pynthut ha u ‘lapbah lapsan u ba khlem shym la ailad satia ïa ki nongpynïaid ban pynsdang ïa katei ka tamasa.
Haba kren sha ki lad pathai khubor ha ka Sngi U Blei kaba dei ka sngi pynkut ïa katei ka tamasa, u Bah Paul u la ong ba katei ka tamasa ka la long kaba ishongkun bad kaba jop bad la sakhi ïa ka jingïoh kiew rynsan jong ki nongtem nongput kiba napoh kane ka jylla kumjuh jong ki nongtem nongrwai nabar ka jylla bad nabar ka ri ruh kumjuh.
U Bah Paul u la ong ruh ba ha kaba ïadei pat bad ki paidbah nongwan peitkai sha katei ka tamasa, ki la don haduh kumba 65% kiba dei nabar ka jylla. Lyngba ka jingwan jong kine nongpeitkai, ka la pyni ïa ka jingjop kaba khraw bha haduh katta katta bad ka jingbym lah ban mutdur.
Shuh shuh u Bah Paul u la ong ba ha ka jingpynlong ïa ka tamasa Cherry Blossom ha ki ar snem ba la leit, ka jingwan jong ki paidbah sha katei ka tamasa ka long kumba 48% ne 52% eiei hynrei ha kane ka kynti pat la sakhi kumba 70% ki nongwan peitkai.
“Kane ka tamasa Cherry Blossom ka la long kaba paka tam haduh u pud ba u nongrah ktien jong ka Japan u la wan dalade sha kane ka tamasa bad u la kwah ïa ngi ban sakhi ïa ka tamasa Cherry Blossom ha Japan ha u bnai Jymmang khnang ba kiei kiba la leh ki briew ha Japan, ngin wanrah ban pynbha shuh shuh ïa ka tamasa Cherry Blossom hapoh kane ka jylla ha u bnai Naiwieng”, la ong u Bah Paul.
