Shillong, Naiwieng 20
Hadien shisngi ba ki nongïalam shnong ka Mawlai Mawdatbaki ki la leit ban ïakynduh ïa u Symbud Myntri Rangbah ka jylla, u Bah Prestone Tynsong ban leh eiei noh ban ïada ïa ka ïaid ka ïeng jong ki paidbah na ka jingshah lymbub ha ki kali bad ki thuk thuk, na ka liang ka tnad PWD ka la shna bad buh noh da uwei u ‘Speed Breaker’ ha ka surok pdeng jong ka Mawlai Mawdatbaki khnang ban tehlakam ïa ka jingpynher sted jong ki kali bad ki thuk thuk ar shaka ha katei ka surok.
Katei ka jingbuh ïa utei u ‘Speed Breaker’ ka long hadien ka jingkhlad noh jong kawei ka longkmie hadien ba kawei ka thuk thuk kaba la pynher sted ka la leit ban tynrah beit beit ïa ka haduh ba kan da duh ei ïa la ka jong ka jingim kaba la jia ha ka surok Mawlai Mawdatbaki ha ka janmiet jong ka 13 tarik u Naiwieng 2023.
Kumta na ka liang ki bor shnong ki la leit ban ïakynduh ïa u Symbud Myntri Rangbah ha ka 16 tarik mynta u bnai ban dawa ba un shimkhia ïa ka jingdon jong kiba ñiah khlemakor ïa ki kali bad ki thuk thuk ar shaka.
Haba ïoh ban ïakren bad u General Secretary ka Mawlai Mawdatbaki, u Bah L.S Lyngdoh u la ïathuh ba ki la leit ban ïakynduh ïa u Bah Prestone ha ka 16 tarik u Naiwieng 2023 bad shisngi hadien ki la wan ki pulit pynïaid kali ban peit ïa katei ka surok bad ha ka 18 tarik u Naiwieng 2023 pat, ki la wan ban buh da u ‘Speed Breaker’ ban tehlakam ïa ka jingdon jong kiba leh khlemakor ban pynher sted ïa ki kali bad ki ar shaka.
Ka shnong ka la pynpaw ruh ïa ka jingsngewnguh ïa u Symbud Myntri Rangbah bad ïa ki bor pulit pynïaid kali kiba la shim khia ïa katei ka mat ban tehlakam na ka jingma ba ki kali bad ki ar shaka ki buh ïa ka ïaid ka ïeng ki paidbah khamtam ïa ki khynnah skul.
U Bah Lyngdoh u la ïathuh ba ka shnong ka la ïoh ruh ban pynbeit ban buh ‘Speed Breaker’ ha shilynter ka lynti naduh napoh Mawlai Petrol Pump haduh Mawlai Mawroh khnang ban tehlakam ïa ka jingpynher sted jong ki kali bad ki thuk thuk.
“Na ka liang u Symbud Myntri Rangbah u la aibor lang ïa ka Mawlai Town Dorbar ban ïa peit lang khamtam ki Rangbah Shnong ha ki bynta bad ki jaka kiba ki shnong ki dei jong ki, ba kin peit ha kano ka jaka ba donkam ban buh ïa u ‘Speed Breaker'”, la ong u Bah Lyngdoh.
U Bah Lyngdoh u la ong ba watla na ka liang ka tnad PWD ka la ong ba lada buh ‘Speed Breaker’ kan wanrah ïa ka jingdheng kali nalor kiwei kiwei ki daw kiba la mih hynrei kum ki nongshong shnong ki sngewthuh ba lada khlem ka jingdon jong u ‘Speed Breaker’ kum ka rukom ñiah kali jong ki briew kiba mynta, ka la long kaba ishyrkhei bad ka buh jingma shikatdei eh ïa ki nongleit nongwan ba kin jam na shiliang shaliang kawei ka surok.
“Kim don jingpyrkhat shuh ki nongñiah arshaka kiba la ñiah ha la ka mon bad leh katba mon khlem tip aiñ ne kyndon shuh, kawei na ki daw ba ngi lap bunsien hi ka dei ba ki khynnah ki dei ki bym pat biang kyrta hi kiba la ñiah ïa ki ar shaka”, la ong u Bah Lyngdoh.
Na ka liang u Bah Lyngdoh u la kyntu ruh ïa ki bor ba dei khmih ba ki dei ban pynkhlaiñ ïa ka aiñ bad ban long pyrkhing ha kaba ïadei bad ki laisen na ka bynta ki khynnah ki bym pat kot ïa ka 18 snem ka rta shaneng kiba ïohlad ban ñiah bad pyndonkam ïa ki kali ne ar shaka ha ki surok.
Shuh shuh u la kyrpad ruh ïa ki kmie ki kpa ba ki dei ban kiar na ka jingpynthied ïa ki kali bad ki thuk thuk ïa ki khun ki kti katba kim pat biang kyrta ban pyndonkam ïa ki khnang ban lait ban buh jingma ym tang ïa ki nongleit nongwan hynrei ban lait buh jingsngewsih ruh ïa ki bahaïing bahasem.
