Khliehriat, Naiwieng 20
Ki pulit jong ka East Jaiñtia Hills District ki la ïoh ban kurup haduh 4135 bilor ka dawai jyrhoh (phensedyl) ba 100 ml na kawei ka trok kit umphniang kaba la kylla sha synrang ha ka lynti surok bah NH-06 ha ka shnong Umtyra bad kem noh ïa u briew uba donkti.
Katkum ka kyrwoh na u Superintendent of Police ka East Jaiñtia Hills District u Jagpal Singh Dhanoa, IPS, u la ïathuh ba ha ka 17 tarik Naiwieng ki la ïoh jingtip ba ka don kawei ka trok kit umphniang kaba don ïa u Registration Number NL01-AH-2246 kaba la kylla shapoh synrang ha ka shnong Umtyra.
U nongñiah jong kane ka trok uba kyrteng u Shakeep Sheik uba dei na ka jylla Maharashtra u la sahkut hapoh ka jaka shong jong ka trok bad mynsaw jur bad hadien ba la pyllait ïa u, la pynkit noh sha Civil Hospital Khliehriat ban pynïoh ka jingsumar.
Ha ka jingtohkit, une u nongñiah u la ïathuh ba kane ka trok ka dei kaba kit diesel ha kaba la lap ruh ïa ki kot ki sla na ka jaka buh jong kane ka trok. Hynrei, hadien ba la bishar bniah ïa ki kot ki sla la shem ba ka kyrteng jong u trai bad ka jaka sah ka ïapher na ka e-challan App.
Kumta la pynlong ïa ka jingtohkit na ka shlem treikam jong ka Bharat Petroleum Transport bad la pyntip ba kane ka kali kam shym la kit ïa ka umphniang diesel na ka jaka jong ki kaba la wanrah pat ka jingsuba sniew, bad namar kata la pynlong ka jingtalasi bniah ïa katei ka trok ban lap ïa ki jingshisha.
Ha ka jingtalasi la lapdien ïa ka bynta ba la shna kyrpang da ka nar hapoh jong kane ka trok bad hangta ki don haduh 4135 tylli ki bilor dawai jyrhoh Phensedyl.
Ryngkat ka jingdonlang ki sakhi ba laitluid bad da ka jingïarap jong ki nongot nar la lah ban weng ïa katei ka jingker ba kyrpang ha ki bynta ba kyndong jong ka kali.
Ha ka jingpeit bniah la shem ïa ka jingdon jong ka kynja drok ‘codeine’ kaba la shah kheiñ be-aiñ. Halor kane, na ka liang ki pulit ki la pynrung case hapoh ki kyndon ka NDPS Act hapoh ka thanat Khliehriat.
