Shillong, Naiwieng 20
Ka Sorkar Jylla ka la buhthong ba naduh u snem 2025, baroh ki skul kiba hap ha ka jingpeit ka Meghalaya Board of School Education (MBoSE) ki hap ban pyndonkam beit da ki kot pule ka National Council of Educational Research and Training (NCERT), ym shuh ban pule da ki kot kiba jied katkum ka jingsngewbit jong ki skul.
U Myntri ka tnat pule puthi, u Rakkam A Sangma u la ong ba hadien ba la dep mynjur da ka Kynhun Myntri ban pynrung da ki kot pule ka NCERT ha ki jaka pule da kaba sdang shwa ha ki katto katne ki sobjek naduh klas-I haduh klas-X.
Na ka bynta ki khynnah klas-I haduh klas-V yn shon ïa ki kot ha ki lai tylli ki ktien, English, Khasi bad Garo, katba ïa ki klas-VI haduh klas-X yn pyndonkam ha ki saw tylli ki sobjek – English, Mathematics, Science bad Social Science.
U Rakkam u la ong ba mynta ka don ka scrutiny committee jong ka MBoSE kaba peit bniah ïa ki lynnong kot kiba ym donkam bad ïahap bad ai jingmut ban weng noh.
U la ong ba ka jingdon bun tylli ki kot pule na ka bynta kawei sobjek ka buh jingeh ïa ki khynnah skul bad ïa ki kmie ki kpa kiba hap siew kiba hap pynlut bun ka pisa.
Hynrei da kaba pynrung ïa ki kot ka NCERT ha ki skul, ka jingbun tylli ki kot pule ka kham duna noh.
Kumta u la bynrap ba ka scrutiny committee jong ka MBoSE kan sa khmih bha ïa ki kot bad ki lynnong kiba don hapoh jong ki kot bad kino-kino ki lynnong ki bym da ïahap dei ban weng noh.
Shuh shuh u Myntri u la ïathuh ba ka tnat pule puthi ka banjur ruh ban don kawei ka sobjek kaba dei thik ban pule shaphang ki riti ki dustur, ka shad ka kmen, ka lariti ki jaitbynriew trai muluk, nalor ka geography jong ka Jylla bad ruh ki bynta kiba dei shaphang ka Khyrnit Bahynriew jong ka Riti Synshar ka ri India.
U la ong ba ki trai muluk ki dei ban tip katto-katne shaphang ki riti dustur bad tynrai jong ki jaitbynriew trai muluk da kaba pynrung ïa ki ha ka kot pule ne sobjek.
