Shillong, Naiwieng 20
Ki samla pule ka North Eastern Hill University (NEHU) ha ka Lah Sngi U Blei ki la leit tur sha kamra treikam u Vice-Chancellor, Prof. P.S. Shukla ban dawa weng kam mardor ïa uwei u bar Jylla uba la shah kynnoh donkti ban thombor ïa kawei ka kynthei briew ha katei ka skulbah.
U VC u la shah pynbor ban leh eiei pyrshah ïa u Assistant Sports Director, u Nantu Das, uba la shah kynnoh donkti ban thombor ïa kawei ka kynthei kaba dei ban leit synran ïa ka kynhun (kynthei) jong ka skulbah ban leit ïashim bynta ha ka jingïakob ‘Inter-University’ ka ban sa long ha Odisha ha ka taïew ban wan.
Na ka liang ka KSU-NEHU Unit ka kwah ba u VC un sospon mardor ïa u Das bad weng noh ïa u na ki kam bapher-bapher kiba la bynshet ha u.
Ha kajuh ka por, ka NEHUSU ka la dawa ban weng kam mardor ïa u Das uba la shah kynnoh donkti ban thombor ïa katei ka kynthei.
Haba kren sha ki lad pathai khubor hadien ka jingïalang bad u VC, u President ka KSU-NEHU Unit, samla Sandy Sohtun u la ong ba u VC u la pan por 2 sngi na ki ban khmih bniah ïa ka jingpynshitom pyrshah ïa u Das.
“Ngin pynlong da ka jingïakhih lada u VC um leh eiei,” ong u samla Sohtun.
Katkum ka jingïathuh jong u, ka skulbah ka la kyrpad ïa katei ka lanot ban synran lang ïa ka kynhun ïalehkai ki kynthei sha katei ka jingïakob.
Haba pynsngew ba la kyrpad ïa katei ka lanot da utei uba shah kynnoh donkti ban wan sha skulbah ha ka Sngi U Blei, u samla Sohtun u la ong ba utei u Assistant Sports Director u la leit shaw hi da lade ïa ka na Umshyrpi ïa kaba ym shah satia ban leh kumtei.
“Ym tang katne, balei ba la phah wan ïa ka ha ka Sngi U Blei, ka bym dei ka sngi treikam,” buh jingkylli utei u nongïalam. U la ong ruh ba la ïalam ïa katei ka lanot sha Kiang Nangbah, Old Guest House.
Na ka liang u samla Sohtun u la ong ba dei ha katei ka jaka la kynnoh ba utei u briew u la pyrshang ban thombor ïa ka. “Hynrei ka la ïakhun bad ïoh lad ban phet na utei u briew,” u la ong. U la ïathuh ruh ba ka seng ka la leit mar-mar sha katei ka jaka hynrei ka la lap tang ïa ka lanot naba utei u briew u la ïoh ban phet krad.
“Ngi la ïohsngew ba u la phah ïa ki pulit ban synran ïa u sha thanat Mawlai,” u la ong.
Haba pynpaw ba ki la ap ïa ka jingwan ki bahaïing hasem, u la ong ba ki bahaïing hasem haba ki la wan poi ki la shim ka rai ban ujor da ka ejahar.
“Ngi la leit sha thanat ban ujor ejahar bad ngi la ïohi ïa u Assistant Sports Director u don ha kti ki pulit. Hadien kane, la ïalam ïa ka lanot da ki pulit na bynta ban phah leit eksamin katkum ka kyndon,” ong u President ka KSU-NEHU Unit.
Ha kawei ka liang, ka NEHUSU ka la dawa ban weng kam mardor ïa u Das halor katei ka bynta.
“Ngi kyrpad ïa ki samla pule ban ïatylli lang kawei pyrshah ïa kine ki jait kam. To ngin kren da kaba shai ba ngi kyntait ïa kitei ki jait kam hapoh skulbah bad ka seng ka ïeng ban ïakhun ban pynneh-pynsah ïa ka hok jong baroh,” ong ka NEHUSU.
Haba kren sha ki lad pathai khubor, u General Secretary ka NEHUSU, samla Rudolf Carey Chyne u la ïathuh ba utei u briew uba la shah kynnoh donkti u don ha kti ki pulit hadien ba la kem ïa u ha ka Sngi U Blei.
U samla Chyne u la ong ba hadien ba la ïoh pdiang ïa ki jingujor pyrshah ïa u Das, ka seng ryngkat ki kmie ki kpa jong ka lanot ki la ujor ejahar pyrshah ïa utei u briew.
Halor katei, ka NEHUSU ka la ïakynduh ïa u VC ban dawa ïa ka jingpynshitom kaba tyngeh na ka liang ka skulbah pyrshah ïa utei u briew khnang ban pynneh-pynsah ïa ka jinglong khuid jong ka skulbah.
“Ka jingweng ïa utei u briew ym tang ba kan pynïoh ïa ka hok ïa katei ka kynthei, hynrei ka sienjam kaba kongsan ha ka ban ïada bad wanrah ka jingshngaiñ bad ka bha ka miat na bynta ki samla pule, nongtrei, kumjuh jong ka skulbah baroh kawei bad u paidbah ba bun balang,” u la bynrap.
