Jowai, Naiwieng 20
Shisngi hadien ba la bteng biang ïa ka jingïakhih ban pyrshah ïa ka jingbym ïoh tulop, ki nongtrei jong ka Jaiñtia Hills Autonomous District Council (JHADC) kiba don hapoh ka synjuk jong ka Jaiñtia Hills Autonomous District Council Staff Association ki la weng noh ïa ka jingïakhih hadien ba ka sorkar ka la kular ban shim khia ban pyllait ïa ka bhah khajna ba dang sah jong ka council ha kaba kut jong u Naiwieng.
Ïa kane la pyntip da ka Secretary jong ka JHADC sha ki nongtrei jong kane ka council haba khot ïa ki ban ïakren na ka bynta ban weng ïa ka jingïakhih kaba ki thmu ban pynlong lai sngi lynter ka ban kut ha ka 22 tarik mynta u bnai.
Ha ka jingïalang kaba donlang bad ki ophisar ka JHADC, ka Secretary ka la pynsngew ba ka jingpynlong ïa ka jingïakhih kaba khah-khah ka ktah ïa u babun balang nalor ba ka ktah ruh ïa ka jingïoh jong ka JHADC ha ka liang ka jingïoh lum khajna kaba man ka sngi.
Na ka bynta ka jingbha bad ka jingbit jingbiang, ka la kyrpad ïa ki nongtrei ba kin weng noh ïa ka jingïakhih bad ka ngeit ba lyngba jingtrei shitom jong ka EC bad ryngkat ki nongtrei ka council, ka sorkar Jylla kan shimkhia ban pyllait ïa ka bhah ba dang sah jong ka council ha kaba kut jong u Naiwieng 2023.
Palat 500 ngut ki nongtrei jong ka Jaiñtia Hills Autonomous District Council (JHADC) ha ka sngi Nyngkong ki la pynlong ka jingïakhih kaba jar jar ha phyllaw ka council ban pyrshah ïa ka jingbym ïoh tulop jong ki mynta la 8 bnai kynthih.
Kumta kum ka dak ban burom ïa ka jingkyrpad ka Secretary JHADC ki nongtrei ka council ruh ki la weng noh ïa ka jingïakhih.
