Shillong, Naiwieng 20
Ki Regional Committee ka Meghalaya bad Assam kiba peit ïa ki jaka ïakajia pud hapdeng ka West Jaiñtia Hills bad West Karbi Anglong kim pat buh sngi ban ïakynduh lang khamtam hashwa ban leit jngoh ki Myntri Rangbah na baroh ar tylli ki Jylla ïa ka thaiñ Khanduli-Psiar kaba dei kawei na ki jaka ba ïakajia pud.
U Chairman ka Regional Committee na Meghalaya, uba peit ïa ki jaka ha West Jaiñtia Hills, u Bah Sniawbhalang Dhar u la ong ba haduh mynta, ym pat pynbeit ïa ka jingïakynduh jong ki Regional Committee na baroh ar tylli ki Jylla.
U la ong ba ki ar tylli ki Jylla ki la buhthong ban pyndep noh shwa ïa ka jingpynbeit pud ha kiwei ki jaka hynrei ïa ki jaka ha West Jaiñtia Hills kan dang kham shimpor bad ym pat lah ban buh por ban lah ban pynbeit.
Ha ka jingïakynduh lang jong ki Myntri Rangbah ka Assam bad Meghalaya ha Assam State Guest House, Koinadhara ha Khanapara, Guwahati ha ka 30 tarik Nailur, 2023, la rai ban pyndep noh ïa ka jingpynbeit pud ha ki lai tylli ki jaka kiba kynthup ïa ka Langpih, Borduar bad Deshdoomreah namar bun ki kam la nang pyndep da ki Regional Committee.
Hynrei ïa ki jaka ha thaiñ Khanduli-Psiar, ki Regional Committee jong baroh ar tylli ki Jylla kin nang pyndep ïa ki kam nalor ki jaka kum ka Block-I & Block-II namarba ki dei kiba kham eh ban pynbeit ïa u pud.
U Bah Sniawbhalang Dhar u la ong ba ïa kine ki jaka yn dang kham shimpor bad ym pat lah ban buh por lypa ban lah pynbeit noh kloi.
Halor ka jingleit jngoh ki Myntri Rangbah ïa ka thaiñ Khanduli-Psiar, u la ong ba ïa kane ruh ym pat lah ban ong namar dang hap ban pynbeit lang hapdeng ki ar Jylla.
Ha ki khyndiat bnai ba la dep, ka jingleit jngoh ki Myntri Rangbah la buhteng noh shwa namar ka mih ka jingïakynad ha ka thaiñ Lapangap hapdeng ki paid Khasi bad Karbi. Haba ïadei bad ki 6 tylli ki jaka kiba la dep ban soi ïa ka soskular pynbeit pud ha u snem ba la dep, ki ar tylli ki Jylla ki la pyndep ïa ka jingpruid dak ïa u pud ha Hahim, katba ha 5 tylli kiwei pat yn sa pyndep noh ïa ka jingpruid laiñ ïa u pud u sam la kumno-kumno hapoh ka 31 tarik Nohprah, 2023.
