Jowai, Naiwieng 20
Kum shi bynta ban khanglad na kino-kino ki jingjia ba sngewsih bad ruh ban pynsuk ïa ka leit ka wan jong ki kali bad ki paidbah nongleit nongwan namar ka jingdon jong ki nongshong dukan madan, u Deputy Commissioner ka West Jaiñtia Hills u la pynmih ïa ka hukum kaba pyntip ba na ka liang u Executive Magistrate ka West Jaiñtia Hills u Bah WK Kharbuli un pynlong ka jingleit khynra ha ka 24 tarik mynta u bnai ban kyndang bad weng lut ïa ki nongdie madan na ki lynti ïaid kjat kiba don ha ki surok.
Kane ka jingkyndang ïa ki nongdie madan kan long naduh ki bynta jong ka lad Thomas Jones haduh HK Singh Higher Secondary School, Iawmusiang khamtam ïa kito kiba die jaiñ hajan ka shlem treikam u DC.
