Shillong, Naiwieng 20
Ka Sorkar Jylla kan sa sa ïakren bad ka tnad kam pohïing ka Sorkar Pdeng halor ki jingdawa ba la buh da ka kynhun kieng atiar – Hynñiewtrep National Liberation Council (HNLC) na bynta ka kylla ban wan jong ka jingïakren ïasuk, la ong uwei u heh ophisar ha ka Lah Sngi U Blei.
Ka seng kaba don hapdeng ka jingïakren ïasuk bad ka Sorkar Kmie, kumjuh ka Sorkar Jylla, ka la byrngem ban ym ïashim bynta ha ka kylla ban wan jong ki jingïakren lymda ka Sorkar ka weng ïa baroh ki mukotduma ba sahteng pyrshah ïa ki dkhot ka seng bad soi ïa ka soskular sangeh ïasiat.
Ha ka kyrwoh ba la pyllait da u Bah Bobby Marweiñ, ‘Chairman cum C-in-C’ ka HNLC, bad Bah Saiñkupar Nongtraw ‘General Secretary cum Publicity Secretary’ ka HNLC, la ong ba ka Sorkar ka ong ba dei ban wan ïashimbynta hi ki khmat nongïalam da u Chairman bad General Secretary, hynrei “ngi kren shai ba lada ym pat weng ïa ki kyndon ba shah pynngat pyrshah ïa ngi, lane lada ym pat soi ïa ka soskular (framework agreement for a ceasefire is signed), u Chairman lane General Secretary kim pat lah ban wan ïashim bynta sha ka jingïakren.”
Uwei u heh ophisar na ka tnad kam pohïing ka Jylla u la ong ba ka Sorkar kan sa khmih bniah ïa ki kyndon ba la buh da ka HNLC.
“Ka Sorkar kan sa khmih bniah ïa ki kyndon ba la buh da ka HNLC la yn pdiang ne kyntait. Ka Sorkar kan hap ruh ban ïakren bad ka tnad kam pohïing ka Sorkar Pdeng naba ki ruh ki ïadon bynta ha kane ka jingïakren ïasuk,” la ong utei u ophisar ka tnad u bym shym la kwah pynpaw kyrteng.
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong u la ong ïa ka HNLC ban pynsngew ïa ka rai jong ka halor ka jingkyrpad ka Sorkar na bynta ka jingïadonlang jong u Chairman bad General Secretary ha ka kylla ba ar jong ka jingïakren ïasuk ka ban sa long shen.
Hynrei, u Bah Bobby Marweiñ bad Bah Saiñkupar Nongtraw ki la pynpaw ba ka HNLC ka la bynshet pura ïa kane ka kam ha u Vice-Chairman bathymmai, u Teimiki Laloo haba ïadei bad ka jingkhmih ïa ka kam jong ka jingïakren ïasuk.
Ha u Nailar 2022, ka National Investigation Agency (NIA) ka la mudui pyrshah ïa 4 ngut ki dkhot jong katei ka kynhun halor ka jingkynnoh donkti buh ‘bomb’ ha phyllaw jong ka karkhana Star Cement, East Jaiñtia Hills ha u Nohprah, 2020 namar ka jingbym lah ban siew ïa ka jingdawa pisa.
Ka jingtohkit ka lap ba ïa ka jingpynbthei la leh da ka seng hadien ba u trai jong ka kompeni um shym la lah ban siew ïa ka khajna be-aiñ kaba la dawa da u Bah Marius Rynjah, ba ju khot sin u Hep Koit, u Finance Secretary jong ka seng, ong utei u ophisar.
Ki 4 ngut kiba la paw kyrteng ha ka jingmudui ki kynthup ïa u Emmanuel Suchen na Lumshnong, jong ka Ri-lum Jaiñtia ka Jylla lem bad 3 ngut kiwei pat kiba dei ki nongshong shnong ka Moulvibazar distrik, Bangladesh ba kynthup ïa u Chairman ka HNLC, Bah Bobby Marweiñ, General Secretary, Saiñkupar Nongtraw bad Marius Rynjah. (UNI)
