Shillong, Naiwieng 21
Ka Meghalaya High Court ha ka Sngi Ba-Ar ka la ai hukum ban pyllait jamin ïa uwei u briew uba la shah kem halor ka jingkynnoh ba u la donkti ha ka kam khaïi ksiar.
U Sadeep Kumar Sunar u la shah kem ha kaba ïadei bad ka jingujor ha thanat Nongpoh (Case No. 116 (10) 2023) hapoh ki kyndon 120B/420/467/468/424/32a9/411/414/34 IPC. Na ka liang ka para jong u Sadeep ka la ujor da ka mukotduma sha High Court da ka jingkyrpad ban ai jamin ïa u.
Lah ban kdew ba ha ka 5 tarik Risaw, 2023 ha ka por kumba 7:30 janmiet, ki pulit ka Byrnihat Outpost ki la ïoh jingtip ba u Sadeep u la don ha lynti bad u la rah lang bad ka ksiar (Gold Biscuit) na Shillong sha Guwahati.
Ha ka por kumba 8:02 mynmiet, la ïoh ban pynsangeh ïa kawei ka kali kamai (Tourist) ha ka khyrdop ba la shna da ki pulit bad la lap ba ki la don lai ngut ki briew hapoh ka kali. Nalor jong u Sadeep, bad u nongñiah ïa ka kali, la don lang sa kawei ka briew ba la tip kyrteng kum ka Radhika Vetwal. Haba la khynra ïa ka kali, la lap ïa hynñiew tylli ki biskit ksiar (Gold Biscuit) na ka Radhika Vetwal.
Ha ka por ba la tohkit, ki briew kiba shong ha katei ka kali ki khlem lah ban ai ïa ki jubab ba shai halor ka jingdon jong kitei ki ksiar khlem ki kot ki sla kiba biang bad namarkata, la bat noh ïa ki ban tohkit kham bniah. Hadien katto katne por, ki pulit ki la kem noh ïa u Sadeep Kumar Sunar bad ka Radhika Vetwal. Ka jingkem ïa kine ki arngut ka dei hadien ka jingai ïa ka FIR ha ka 5 tarik Risaw, 2023, da u Sub-Inspector Amit Sinha na ka Byrnihat Outpost.
Na ka liang u muktiar jong katei ka nongmudui u la pynpaw ba katkum ki aiñ ki kyndon, lada lap ïa kino-kino ki tiar ba khaïi be-aiñ, hap ban aiti sha ki briew ka tnat Customs jong ka Sorkar India bad dei ban pynrung ïa ka jingujor hapoh ki kyndon jong ka Customs Act. Hynrei ha kaba ïadei bad katei ka jingjia, ym shym la bud satia ïa kane ka kyndon, bad la pynrung ïa ka jingujor hapoh ki kyndon jong ka Indian Penal Code.
U muktiar u la ong ruh ba u Sadeep Kumar Sunar um donkti eiei bad katei ka kam khaïi ksiar bad ka lah ban long ba ïa kitei ki ksiar ym shym la ïoh satia na u (Sadeep Kumar Sunar). Hynrei wat lada la ïoh na u ruh, yn ym lah ban kurup da ki pulit namar ka don ka kyndon – Section 101 – hapoh Customs Act, 1962 ha kaba ka bor ban khynra bad bad kurup bad kumjuh ruh ban kem la pynkhamti ha u ophisar ka tnat Customs. Nalorkata, hapoh ka kyndon 7 jong ka Section 104 ka Customs Act, lada shah kem, ki briew ki lah ban ïoh jamin.
Nalorkata, u muktiar u la ong ba u Sadeep Kumar Sunar um shym la donkti satia ha kino-kino ki kam be-aiñ ha ki snem ba mynshwa bad dei tang ma u uba kamai ha ïing ha sem ba kynthup ïa ki kmie ki kpa ba la noh ka rta, ka kurim bad ki khun ba dang rit, bad namarkata, u la kyrpad ïa ka High Court ba kan ai jamin noh ïa u khamtam hadien ba u la don ha patok la 45 sngi eiei.
Na ka liang ka muktiar ba mihkhmat ïa ka sorkar ka la kdew ba u Sadeep Kumar Suna u la donkti ha ka jingpynïoh be-aiñ ïa kitei ki ksiar ba la lap na u bad u la kubur ruh ba u la thied hi saw na ki hynñiew tylli ki biskit ksiar (Gold Biscuit) bad lai tylli la thied da ka Radhika Vetwal na uwei u briew ha ka por ba ki la ïakynduh ïa u ha Rynjah, Shillong ha ka 5 tarik Risaw, 2023.
Ka muktiar ka la kdew ruh ba ha kane ka kam khaïi ksiar ka da don da ka kynhun bad ba u Sadeep u la donkti la bunsien ha kine ki kam be-aiñ. La ong ruh ba ki pulit ki dang wad ïa u briew uba la die ïa kitei ki biskit ksiar hynrei ym pat lah ban lap haduh mynta. La bynrap ba lada pyllait jamin ïa utei u briew ka lah ban ktah ïa ka jingtohkit. Namarkata, la kyntu ïa ka High Court ba kan weng syndon ïa kane ka mukotduma.
Hadien ba la sngap ïa ki muktiar bad peit bniah ïa ka Case Diary, ka High Court ka la ong ba ïa ki hynñiew tylli ki biskit ksiar la ïoh na ka Radhika Vetwal. Hynrei u Sadeep Kumar Sunar u la kubur ba u la don bynta ha kane ka kam ha ka por ba u la ong ba dei ma u uba la thied ïa saw na ki hynñiew tylli ki biskit ksiar.
Ka High Court ka la ong ruh ba na ka liang ki pulit ki khlem pat lah ban pynshisha ba u Sadeep u donkti ha ka kam khaïi mar be-aiñ. Lada ka jingkynnoh ka long ba u Sadeep u la donkti ha ka kam khaïi mar be-aiñ, khamtam ïa ka ksiar, ïa kane ka kam la dei ban shimti da ka tnat Customs bad la dei ban pynrung ïa ka jingujor hapoh ka Customs Act. Hynrei ha kaba ïadei bad ka jingkem ïa u Sadeep, ym shym la leh satia kumta.
Hadien ba la peit bniah nadong shadong, ka High Court ka la pynpaw ba lah ban ai jamin ïa u Sadeep, hynrei un hap ban bud ïa ki kyndon. Haba ai hukum ban pyllait jamin ïa u Sadeep, ka High Court ka la buh kyndon da kaba ong ba um dei ban phet ne leh eiei ïa ki sabut ne ki sakhi, um dei ban mih na India khlem da ïoh jingbit na ka ïingbishar, u dei ban leit mih hakhmat u pulit uba tohkit lane ka ïingbishar ba dei khmih, u dei ban siew ïa ka Personal Bond kaba T. 30,000, ryngkat bad uwei u nongbahkhlieh ha kajuh ka dor katkum ka jingibit jong ka ïingbishar kaba tian bishar (Trial Court).
