Shillong, Naiwieng 21
Ka North Eastern Hill University Teachers Association (NEHUTA) ka la dawa na u Vice-Chancellor (VC) ka skulbah, u Prof. P.S. Shukla ban ïaid shakhmat bad ka jingtohkit khnang ba kito kiba shah kynnoh donkti ha ki kam thombor kin ym wanphai shuh sha ka kam.
“Watla u Nantu Das u dang don hapoh ka ‘judicial custody’, ka long kaba donkam ïa u VC ban ïaid shakhmat bad ka jingtohkit kaba kloi hapoh NEHU khnang ba kiba kum kitei ki nongthombor kin ym lah shuh ban wanphai ne pynthohbria ïa ka kam,” ong ki nongïalam ka NEHUTA ha ka kyrwoh khubor.
Kumban shu kdew hangne, ki samla pule ka NEHU ha ka Lah Sngi U Blei ki la leit tur sha kamra treikam u VC ban dawa weng kam mardor ïa uwei u bar Jylla uba la shah kynnoh donkti ban thombor ïa kawei ka kynthei briew ha katei ka skulbah.
Ka NEHUTA ha kajuh ka por ka la ong ba lada ym bud ryntih kumba la dawa da uba bun balang, kata yn shim ba u VC u kyrshan ïa utei uba shah kynnoh donkti ha katei ka kam.
“Ka long ka mat kaba ktah shi kat dei ïa ka jingshngaiñ jong ki samla pule, khamtam ki samla pule kynthei, nonghikai bad dkhot jong ka imlang-sahlang kiba ïadon bynta bad ka NEHU – kano-kano ka sienjam ka ban shim ka bym i don jingmyntoi ka lah ban kyrtoh kylla bad ktah ïa ka kyrteng jong u VC,” ong ki nongïalam ka NEHUTA.
Kumta ka seng ka kyntu ïa u Prof. Shukla ban pynshitom ïa utei u briew uba shah kynnoh thombor – u bym lah ban shu ïaid laitlan khlem kano-kano ka jingpynshitom.
“Ngi da sngewsih shi kat dei halor ka jingshah kynnoh thombor jong kawei ka ‘Football Referee’ ha u Asst. Sports’ Director, Nantu Das, kaba katei ka jingleh jong u ka wanrah ka jingkhuslai bad ka jingpynrem jur,” ong ki nongïalam ka NEHUTA.
Ka seng ka la ong, “Kumba ka long, la kynnoh ba u Nantu Das u dei uba ju mlien ïa kitei ki jait kam, naba ki jingpynsngew na katto-katne ngut kiwei pat ki kynthei ba ïashim bynta ki kdew ïa ki kam be-aiñ jong u Das, uba la shim kabu ïa ki kam ïalehkai jong ki kynthei kum ka madan na bynta ki kam be-aiñ jong u.”
Na ka liang ka NEHUTA ka la ban jur halor ka jingdonkam ban pynlong ïa ka prokram halor ka ‘Gender Sensitization’, ka jingkhang lad ïa ki kam thombor bad ki jingleh bakla.
“Ki briew kum u Nantu Das ki kharoi ha ka jinglong-jingman ka bym don ïa ki jingpynshitom kiba tyngeh ne ka jingkhang lad ïa ki nongleh kam bymman,” ong ka seng.
Shuh shuh ka NEHUTA ka pynpaw ka jingsngewkhia ba ka skulbah kam shym la lah ban khang lad ïa kaba kum katei ka jait kam na ka por sha ka por bad khamtam ha kane ka kynti – da u briew uba khmih ïa ka tnad ‘Security’.
“Kane ka buh jingkylli halor ka bha ka miat jong ki kynthei ha ka skulbah ha kaba ki kynthei ki kham bun, la ka long ha ka liang ka jingrung kam bad ka jingïashim bynta ha ki prokram bad ki kam bapher-bapher jong ka skulbah,” ong ki nongïalam.
