Shillong, Naiwieng 21
U Symbud Myntri Rangbah barim ka Jylla bad MLA ba mynshuwa ka Mawlai konstitwensi, u Bah Standlington D. Khongwir u la khlad noh ha ka step jong ka 21 tarik Naiwieng ha NEIGRIHMS, Mawdiangdiang, Shillong.
U Bah Khongwir u la long kum u MLA ka Mawlai haduh 25 snem kynthih bad u la shakri ruh kum u Rangbah Shnong ka Mawlai Nonglum haduh 55 snem. U la long teng ruh kum u President ka Mawlai Town Dorbar.
Ha ki snem kiba mynshwa, u la long uwei na ki ‘rang ïalehkai phutbol uba pawkhmat bha.
U Myntri Rangbah ka Jylla, u Conrad K. Sangma uba la leit sngewlem sha ïingsah u Bah Khongwir ha ka Sngi Ba-ar u la pynpaw ka jingsngewsih halor ka jingkhlad noh u Bah Khongwir, naba u dei u briew uba la noh synñiang shibun ki kam sha ka Mawlai konstitwensi bad ïa ka Jylla hi baroh kawei.
Ha kajuh ka por, u la ïathuh ruh ba u Bah Khongwir u dei uba baroh ki briew ki sngewtynnad bad ki ieid, bad wat haduh ba u khlem long shuh u MLA ruh, ki briew ki dang ïai pyni ka jingkyrshan ïa u, bad kane ka pyni shisha ba u dei u briew uba la leh shibun ki kam ba bha na ka bynta ki paidbah.
“Ngi sngewsih shi kat dei halor ka jingkhlad noh u Bah S.D. Khongwir. Ngi ithuh ïa u kum u ‘riew rangbah uba la synñiang shi kat dei sha ka konstitwensi bad ka Jylla baroh kawei. La ju tip ruh ba u long u briew uba ki paidbah ki ieid,” u la ong.
U Sangma u la ong ruh ba watla u Bah Khongwir um shym la long shuh u MLA, u dang bteng ban ïoh ka jingkyrshan bad jingieid na ki paidbah bad kane ka pyni ïa ka jinglong nongïalam jong u.
Haba kdew ba u la ïoh lad ban ïakren, ïakynduh bad ïatreilang bad u Bah Khongwir ha ki por ba la leit khamtam mynba u dang long kum u Rangbah Shnong, u la ïathuh ba ki la don bun tylli ki jingïalang hapdeng ma u bad u Bah Khongwir bad u la ïoh lad ban shim ruh ïa ki jinghikai na u.
“Nga kynmaw ba nga dang ïakynduh ïa u ha shuwa ka ilekshon bad nga da sngewkmen shi kat dei ban ïoh ïakynduh ïa u. Nga pynpaw ka jingsngewlem sha ka ïing ka sem baroh kawei bad nga duwai ba U Blei Nongbuh Nongthaw un ai ha u ka jingjahthait ka bymjukut,” ong u Myntri Rangbah.
Shuh shuh u Bah Standlington David Khongwir ba ju khot ieid Bah Stand, u dei u kurim jong i (L) Kong Harlismon Tariang bad ka jingleit ontep donburom ïa ka met kaba sah kan long ha U Lum Jingtep Ka Balang Mawlai Presbyterian ha ka 24.11.2023 ha ka por 12 baje nohphai sngi na ïing sah jong u ha Mawlai Nonglum mar pyrshah bad ka Madan Weiking Jaïaw.
