Shillong, Naiwieng 21
Ki nongñiah taksi kamai kiba dei jong ka Laitumkhrah Taxi Association ki la pynpaw ka jingsngewkmen halor ka jingsngap bad shah shkor ki bor pulit ïa ka jingkyrpad jong ka synjuk ban weng noh ïa ka jingphah ïaid shi lynti na Polo sha Saw Furlong namar kane ka la ktah ïa ki nongñiah kali kamai.
Kum ban shu pynkynmaw, ki bor pulit pynïaid kali ki la sdang ban phah ïaid shi lynti na Polo sha Saw Furlong kum shi bynta ka jingpyrshang ba shipor. Pynban kane ka jingpyrshang ka la wanrah ïa ka jingdheng kali namar baroh ki kali ha jaka ban ïaid na Saw Furlong sha Polo ki hap ïaid kyllaiñ na ïingsah u Lat sha Nan Polok ban poi sha Polo.
Kumjuh ruh ki nongñiah kali ka Laitumkhrah Taxi Association ki la pynpaw ka jingpyrshah kaba jur halor kane ka jingpyntreikam namar kiba shong kali ki la hap ban hiar noh shiteng lynti. Kane ka wan jia teng namar ha ki por ba kyrkieh kim lah ap ban ïaid shaduh Nan Polok bad hiar noh shiteng lynti ban ïaid da ka kjat.
Haba ïakren bad ki nongkitkam ka Laitumkhrah Taxi Association u Bah Tony Nongbri, u la ai khublei ïa ka tnad pulit pynïaid kali kaba la weng ïa kane ka jingthoh ‘No Entry’ ban ailad biang kum ki por mynshwa ban rung ban mih na Saw Furlong sha Polo.
Nangta u la ai khublei ïa ka Kong Ampareen kaba la ïarap ban pynkhreh ïa kane ka jingeh jong ki nongñiah taksi.
Kumjuh ruh u la pynpaw ba kane ka jingleh ki pulit pynïaid kali ki ong ban shu pyrshang la ka long ne kam long, hynrei namar kam long ki la leh biang da kajuh ka rukom ban ïaid khlem da buh shu ïa ka jingthoh ‘No Entry’.
Kane ka jingphah ïaid tang shi lynti na Polo sha Saw Furlong ka neh tang hapoh 15 sngi naduh ba la pyntreikam ha ka 6 tarik haduh ka 21 tarik mynta u Naiwieng.
