Shillong, Naiwieng 21
U nongïalam ka National People’s Party (NPP) u Bah Sniawbhalang Dhar u la ong ba ka NPP ka dei kaba ïatylli tam na baroh ki seng saiñ pyrthei bad ym don jingeh ban sei kyrteng ha ka ilekshon MP.
U la ong ba ka NPP kam dei kum kiwei ki seng, bad ka dei kaba ïatylli bad ym don jingeh ban shim rai da ka jingmynjur lang.
U la ong ba wat lada ym pat khot ban thep kyrteng ban long u kyrtong ka seng na Shillong Lok Sabha konstitwensi, hynrei ki la don kumba 6 ngut kiba pynpaw ka jingkwah ban pan tiket ban ïakhun ïa ka ilekshon.
“Kam pher lada don katno-katno ngut ruh, ngin sei uwei bad phin sa tip ha kata ka por mano ba dei,” u la ong.
U la ong ba ka seng ka pdiang sngewbha ruh ïa ki nongïalam na kiwei ki seng saiñ pyrthei bad kin sa don kiba wan ban ïasoh.
Haba kylli la ka long kaba shisha ba ka NPP ka khot ïa u MLA barim ka Umroi u Bah George B Lyngdoh, u Bah Sniawbhalang u khlem kubur ne kyntait, hynrei u ong ba ka seng ka kloi ban pdiang lada ki don ki nongïalam na kiwei ki seng saiñ pyrthei kiba wan ïasoh bad u kyrmen ba kin wan ban pynïasoh bad ïatreilang kum kawei ka ïing ka sem jong ka NPP.
