Shillong, Naiwieng 21
U Myntri Rangbah ka Assam, u Dr Himanta Biswa Sarma u la banjur ban don ka jingïatreilang hapdeng ki pulit jong ki Jylla ka Thaiñ Shatei Lam Mihngi bad ban don ki buit treikam kiba ïahap lang kumjuh namar donkam ban ïakhun ïa ki jingeh kiba ïa mad lang kumjuh naduh u drok bad ki kynhun lehnoh kiba treikam nabar ri.
Haba ai jingkren sha ki pulit ophisar na ki Jylla bapher bapher kiba la pyndep ïa ka jingshah hikai ha North Eastern Police Academy (NEPA) Umsaw Khwan, Ri Bhoi District ha ka Sngi Ba-ar, u Himanta u la ong u drok uba wan sha kane ka thaiñ na Myanmar u dei uba mad jingeh lang kumjuh da ki Jylla bad ki kynhun lehnoh kiba dei na ki Jylla ka Thaiñ Shatei Lam Mihngi (North East) ruh ki ïatreilang para maki da kaba sah bad treikam nabar ri bad ki pyndonkam ruh da kijuh ki buit.
U Himanta u la ong ba ki pulit ha kane ka thaiñ ki dei ban don ka jingïajan bad sngewthuh lang ban ïakhun pyrshah ïa ki jingeh kiba long lang kumjuh da kaba pyndonkam ïa ki buit kiba ïahap lang.
Haba phai sha ki kor ki bor bad ka jingpyndonkam ha ki rukom treikam, u Sarma u la ong ba ki pulit ruh ki hap ban pyndonkam bha ïa ki kor ki bor ha ka jingtreikam ka tnat pulit ban lah ban ïada bad khanglad ïa ki kam runar kumjuh ruh ki kam runar kiba ju leh lyngba ki kor ki bor (cyber crimes) bad ban kham biang ka rukom tohkit bad ban pynngat ïa kiba leh kam sniew hapoh ki kyndon ka aiñ.
Kumta une u Myntri Rangbah ka Assam u la kyntu ïa ki pulit ophisar kiba la pyndep ïa ka jingshah hikai ban shim ïa ka bynta jong ki ban leh ïa kamram kaba ki dei ban pyndep bad ban tip ruh ïa la kajong ka bynta kaba ki don kata ban shakri ïa ka Jylla bad ïa ka ri bad khanglad ïa kino ki kam sniew bad kino kino ki jingumsnam, khlem da kheiñ ne ñiew ïa ki jaitbynriew bad kynhun.
Namarkata u la ong ba kaei kaba dei ban pynrung ha ki pulit ka long kim dei satia ban don jingïaishah ïa ki kam runar bad ïa ki ‘riew runar khnang ban pyntikna ban don ka jingshngaiñ ïa ki nongshong shnong, naduh ki kynthei ki khynnah bad kiwei kiwei kiba dei ki nongshong shnong ha ka imlang sahlang.
