Shillong, Naiwieng 21
Ka nongaibuit jong ka Meghalaya ASHA Workers’ Union (MASHAWU) ka Kong Sony Kharjana ka la ïathuh ba ka seng ka la rai ban leit ïakynduh ïa ka Kong Ampareen Lyngdoh kaba dei ka Myntri jong ka tnad ka koit ka khiah jong ka sorkar jylla hadien ba ka la khot ban ïakren kyrpang lyngba ka shuki Director ka tnad ka koit ka khiah.
Ka la ïathuh ba kane ka jingïakynduh kan long lashai ka Sngi Balang ka 22 tarik Naiwieng 2023 ha Secretariat hadien ba ka seng ka la rai ban shong kyllaiñ mungor ha ka 27 tarik mynta u bnai ha Additional Secretary.
Ka Kong Sony ka la ïathuh ba lada kane ka jingïakren bad ka Kong Ampareen kam seisoh ka jingshong kyllaiñ mungor jong ki ASHA kan ïaid beit shakhmat ha ka 27 tarik mynta u bnai.
Ka la ïathuh ba ha kine ki sngi haba ki leit pynshai ha man ki district ki la dep ïakren ba lada ka Kong Ampareen ka khot ïakren kin leit beit tangba ka jingkhot ïakren ka dei beit da ka lynti kaba dei.
Nalor nangta ka la ïathuh ba ka jingdawa jong ki ASHA ka long ba ka sorkar jylla ka dei ban pynkiew ïa ka jingsiew ka jong ki na ka T.2000 shi bnai sha ka T.5000 shi bnai, hynrei ha kine ki sngi haba ki leit ban ïakynduh ïa ka Kong Ampareen ka kren pynduh mynsiem namar ka ong ba kam lah.
Ka la ïathuh ba kane ka jingsiew T.2000 shi bnai sha ki ASHA ka dei kaba la sdang naduh u snem 2021.
Ka la pyntip ruh ba naduh utei snem (2011) ka sorkar ka la ai jingïarap bha ïa ki ASHA namar kito kiba ïoh T.20,000 shisnem na ka Sorkar India, ka sorkar jylla ka ai arshah ïa kaei kaba ai ka Sorkar India ka lah ban long T.40,000 shisnem; ka mut ki ASHA ki dang sngew shngaiñ haba ki trei ïa ka kam hynrei mynta ïa kane ka skhim ban ai shisnem la pynduh noh.
Haduh mynta ki ASHA hapoh ka jylla ki don palat 7000 ngut hynrei ka sorkar ka ai daw ba kam lah kot bor shuh ban siew ïa kine ki jingïarap shisien shisnem hynrei kan shu pynkiew jingsiew T.2000 ha ka shi bnai.
Ka la pyntip ba ki ASHA ki ju ïoh T.1000 lada ka kynthei ka kha khun nyngkong bad khun ba-ar, hynrei mynta ïa kane ruh la pynduh noh.
